മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ട് ഇന്ത്യാ സഖ്യം നവംബർ ഒന്നിന് ഡൽഹിയിലെ രാംലീല മൈതാനിയിൽ നടത്തുന്ന റാലിക്ക് മുന്നോടിയായി കനത്ത സുരക്ഷാ ക്രമീകരണങ്ങൾ. 3,000 ഡൽഹി പൊലീസ് ഉദ്യോഗസ്ഥരെയും 10,000 അർധസൈനിക വിഭാഗം അംഗങ്ങളെയും വിന്യസിക്കാനാണ് നീക്കമെന്നാണ് റിപ്പോർട്ട്. റാലിയിൽ പങ്കെടുക്കുന്നവരെ നിരീക്ഷിക്കാൻ 150 ഹൈ ഡെഫിനിഷൻ, എഐ ക്യാമറകളും സ്ഥാപിച്ചതായി വിവരമുണ്ട്.
റാലിയിൽ 50,000ത്തിലധികം പേർ പങ്കെടുക്കുമെന്നാണ് ഡൽഹി പൊലീസിൻ്റെ കണക്കുകൂട്ടൽ. നവംബർ ഒന്നിന് രാവിലെ 10 മുതൽ വൈകിട്ട് അഞ്ചുവരെയാണ് പരിപാടിക്ക് അനുമതി നൽകിയിരിക്കുന്നത്. നിശ്ചിത സമയത്തിനുള്ളിൽ റാലി അവസാനിപ്പിക്കണമെന്നും തുടർന്ന് പങ്കെടുക്കുന്നവർ മൈതാനത്തുനിന്ന് പിരിഞ്ഞുപോകണമെന്നും നിർദേശമുണ്ട്.
റാലിക്ക് മുമ്പും ശേഷവും രാംലീല മൈതാനിയിൽ താമസിക്കാൻ പാടില്ലെന്നും പരിപാടി നടക്കുന്ന സ്ഥലത്തും ഇരിപ്പിടങ്ങളിലും സിസിടിവി ക്യാമറകൾ സ്ഥാപിക്കണമെന്നും നിർദേശിച്ചതായാണ് റിപ്പോർട്ട്. ക്രമസമാധാനത്തെ ബാധിക്കുന്ന പ്രസംഗങ്ങൾ ഒഴിവാക്കണമെന്നും ഡൽഹിക്ക് പുറത്തുനിന്നും സമീപ സംസ്ഥാനങ്ങളിൽനിന്നുമുള്ള വാഹനങ്ങൾക്ക് നിയന്ത്രണമുണ്ടാകുമെന്നും റിപ്പോർട്ടിൽ പറയുന്നു.
റാലിക്ക് ഏർപ്പെടുത്തിയ നിയന്ത്രണങ്ങൾ രാഷ്ട്രീയ വൃത്തങ്ങളിൽ ചർച്ചയായിട്ടുണ്ട്. ജന്തർ മന്തറിലെ മുൻ പ്രതിഷേധങ്ങളുമായി താരതമ്യം ചെയ്താണ് സുരക്ഷാ ക്രമീകരണങ്ങളെക്കുറിച്ചുള്ള വിമർശനങ്ങൾ ഉയരുന്നത്. അതേസമയം, സുരക്ഷാ ക്രമീകരണങ്ങളും നിബന്ധനകളും സംബന്ധിച്ച വിവരങ്ങൾ ഔദ്യോഗിക ഉത്തരവിലൂടെ സ്ഥിരീകരിക്കേണ്ടതുണ്ട്.
