സ്വത്തിനെച്ചൊല്ലിയുള്ള തർക്കത്തിനിടെ 15 വയസ്സുകാരനായ പത്താം ക്ലാസ് വിദ്യാർഥിയെ പിതൃസഹോദരൻ വെട്ടിക്കൊലപ്പെടുത്തിയതായി പരാതി. ബെംഗളൂരുവിലെ സോലദേവനഹള്ളി പൊലീസ് സ്റ്റേഷൻ പരിധിയിലുള്ള ഇന്ദിര കോളനിയിൽ തിങ്കളാഴ്ച രാത്രിയായിരുന്നു സംഭവം. കൃഷ്ണ എന്ന വിദ്യാർഥിയാണ് കൊല്ലപ്പെട്ടത്. സംഭവത്തിൽ പ്രതിയായ അമ്മാവൻ മോഹൻ (45) ചൊവ്വാഴ്ച രാവിലെ പൊലീസിൽ കീഴടങ്ങി. ഇയാളെ പൊലീസ് അറസ്റ്റ് ചെയ്തു.
ഐവരകണ്ടപുരയിലെ സർക്കാർ സ്കൂളിൽ പത്താം ക്ലാസ് വിദ്യാർഥിയായിരുന്നു കൃഷ്ണ. 12 വർഷം മുമ്പ് പിതാവ് മുനിരാജു ആരോഗ്യപ്രശ്നങ്ങളെ തുടർന്ന് മരിച്ചതിനുശേഷം കൃഷ്ണയും ജ്യേഷ്ഠൻ യശ്വന്തും ഇന്ദിര കോളനിയിലാണ് താമസിച്ചിരുന്നത്. 14 വർഷം മുമ്പ് അമ്മ കുടുംബത്തെ വിട്ടുപോയിരുന്നു. യശ്വന്ത് ദിവസക്കൂലിക്ക് ജോലി ചെയ്യുമ്പോൾ മോഹൻ ഓട്ടോറിക്ഷാ ഡ്രൈവറാണ്.
ദേവനഹള്ളി താലൂക്കിലെ കുന്ദാനയ്ക്ക് സമീപം മുനിരാജുവിൻ്റെ പേരിൽ ഒരേക്കറോളം പാരമ്പര്യ ഭൂമിയുണ്ടായിരുന്നു. മുനിരാജുവിൻ്റെ ഇളയ സഹോദരനായ മോഹൻ, സഹോദരി പുഷ്പയെയും മുനിരാജുവിൻ്റെ മക്കളെയും അറിയിക്കാതെ വ്യാജ ഒപ്പുകൾ ഉപയോഗിച്ച് ഭൂമി യെലഹങ്കയിലെ റിയൽ എസ്റ്റേറ്റ് ഡെവലപ്പർക്ക് വിറ്റുവെന്നാണ് ആരോപണം. ഇതിനെത്തുടർന്ന് പുഷ്പ ബെംഗളൂരു റൂറൽ ജില്ലയിലെ വിശ്വനാഥപുര പൊലീസ് സ്റ്റേഷനിൽ വ്യാജരേഖ സംബന്ധിച്ച് പരാതി നൽകി. പിന്നീട് ഭൂമി ഇടപാടിലെ ക്രമക്കേട് ബിൽഡറുടെ ശ്രദ്ധയിൽപ്പെട്ടു.
ഭൂമിയുമായി ബന്ധപ്പെട്ട തർക്കത്തെച്ചൊല്ലി മോഹനും സഹോദരൻ്റെ മക്കളും തമ്മിൽ നിരന്തരം വഴക്കുണ്ടായിരുന്നതായി പൊലീസ് സംശയിക്കുന്നു. തിങ്കളാഴ്ച രാത്രി യശ്വന്ത് സിനിമ കാണാൻ പോയതിനെത്തുടർന്ന് സുഹൃത്തിൻ്റെ വീട്ടിൽ താമസിച്ചു. ഈ സമയം കൃഷ്ണ വീട്ടിൽ തനിച്ചായിരുന്നു. വീട്ടിലെത്തിയ മോഹൻ കൃഷ്ണയുമായി വഴക്കുണ്ടാക്കുകയും വെട്ടുകത്തി ഉപയോഗിച്ച് ആക്രമിക്കുകയുമായിരുന്നുവെന്നാണ് പൊലീസിൻ്റെ പ്രാഥമിക നിഗമനം.
ചൊവ്വാഴ്ച രാവിലെ ഒമ്പതോടെ വിശ്വനാഥപുര പൊലീസ് സ്റ്റേഷനിലെത്തിയ മോഹൻ, കൃഷ്ണയെ കൊലപ്പെടുത്തിയതായി അറിയിച്ച് കീഴടങ്ങുകയായിരുന്നു. തുടർന്ന് സോലദേവനഹള്ളി പൊലീസ് ഇയാളെ അറസ്റ്റ് ചെയ്ത് അന്വേഷണം ആരംഭിച്ചു.
കൊലപാതകക്കേസ് രജിസ്റ്റർ ചെയ്തിട്ടുണ്ടെന്നും പ്രതിയെ അറസ്റ്റ് ചെയ്തതായും നോർത്ത് വെസ്റ്റ് ഡിവിഷൻ ഡെപ്യൂട്ടി പൊലീസ് കമ്മീഷണർ നാഗേഷ് ഡി.എൽ. അറിയിച്ചു. സംഭവത്തിൽ കൂടുതൽ അന്വേഷണം തുടരുകയാണ്.
