കർണാടകയിലെ റെയിൽവേ സ്റ്റേഷനുകളിൽ ഭക്ഷ്യസുരക്ഷാ വിഭാഗം നടത്തിയ പ്രത്യേക പരിശോധനയിൽ ഗുരുതരമായ ഭക്ഷ്യസുരക്ഷാ ലംഘനങ്ങൾ കണ്ടെത്തി. സംസ്ഥാനത്തെ 36 റെയിൽവേ സ്റ്റേഷനുകളിലായി 112 ഭക്ഷണശാലകൾ, കാന്റീനുകൾ, സ്റ്റാളുകൾ, പാൻട്രി കാറുകൾ, ഭക്ഷണം തയ്യാറാക്കുന്ന കേന്ദ്രങ്ങൾ എന്നിവയാണ് ഉദ്യോഗസ്ഥർ പരിശോധിച്ചത്.
പരിശോധനയിൽ കാലാവധി കഴിഞ്ഞ പാൽ, തൈര്, ശുചിത്വമില്ലാത്ത രീതിയിൽ സൂക്ഷിച്ച ഭക്ഷണസാധനങ്ങൾ എന്നിവ കണ്ടെത്തി. ഹാവേരി ജില്ലയിലെ ഒരു റെയിൽവേ സ്റ്റേഷനിൽ കാലാവധി കഴിഞ്ഞ നന്ദിനി തൈരും ഡോഡ്ല സ്റ്റാൻഡേർഡൈസ്ഡ് പാലും കണ്ടെത്തിയതായി അധികൃതർ അറിയിച്ചു.
ഭക്ഷണം പത്രക്കടലാസിൽ പൊതിഞ്ഞ് വിതരണം ചെയ്യുന്നതും പരിശോധനയിൽ കണ്ടെത്തി. സമോസകൾ കാർഡ്ബോർഡ് പെട്ടികളിൽ സൂക്ഷിച്ചതും വട പത്രക്കടലാസിൽ വെച്ചിരുന്നതും ശ്രദ്ധയിൽപ്പെട്ടു. ചട്ണി ഭക്ഷ്യസംഭരണത്തിന് അനുയോജ്യമല്ലാത്ത പ്ലാസ്റ്റിക് ബക്കറ്റുകളിൽ സൂക്ഷിച്ചതായും കണ്ടെത്തി.
ഭക്ഷണങ്ങളിൽ അനുവദനീയമല്ലാത്ത നിറങ്ങൾ ഉപയോഗിച്ചതായും സംശയം ഉയർന്നിട്ടുണ്ട്. ജിലേബിയിൽ മഞ്ഞ നിറവും ഖോവ പേടയിൽ പിങ്ക് നിറവും ഉപയോഗിച്ചതായി പരിശോധനയിൽ കണ്ടെത്തി. ചില സ്ഥാപനങ്ങളിൽ ഉള്ളി, പച്ചക്കറികൾ എന്നിവയിൽ ഫംഗസ് ബാധയും കണ്ടെത്തി.
ബെംഗളൂരുവിലെ കെ.ആർ. പുരം റെയിൽവേ സ്റ്റേഷനിലെ ഒരു ഭക്ഷണശാലയിൽ ശുചിത്വമില്ലാത്ത സാഹചര്യം കണ്ടെത്തിയപ്പോൾ, മൈസൂരു സ്റ്റേഷനിലെ ചില ഭക്ഷണം തയ്യാറാക്കുന്ന കേന്ദ്രങ്ങളിൽ പ്ലാസ്റ്റിക് വസ്തുക്കൾ ഉപയോഗിച്ച് ഇഡ്ലി തയ്യാറാക്കുന്നതായും കണ്ടെത്തി. അതേസമയം ഹുബ്ബള്ളിയിലെ വന്ദേ ഭാരത് ക്ലസ്റ്റർ കിച്ചൻ വൃത്തിയുള്ള നിലയിലായിരുന്നുവെന്ന് ഉദ്യോഗസ്ഥർ വ്യക്തമാക്കി. ഭക്ഷ്യസുരക്ഷാ മാനദണ്ഡങ്ങൾ ലംഘിച്ച സ്ഥാപനങ്ങളുടെ വിവരങ്ങൾ റെയിൽവേ അധികൃതർക്ക് കൈമാറുമെന്നും ബന്ധപ്പെട്ട ഭക്ഷ്യവ്യാപാര സ്ഥാപനങ്ങൾക്കെതിരെ നിയമനടപടി സ്വീകരിക്കുമെന്നും ഭക്ഷ്യസുരക്ഷാ വകുപ്പ് അറിയിച്ചു.
