മഴ കുറഞ്ഞ സാഹചര്യത്തിൽ ബെംഗളൂരുവിൽ സഞ്ചാരി കാവേരി ജലവിതരണം കൂടുതൽ വിപുലീകരിക്കാൻ ബെംഗളൂരു ജല വിതരണ ബോർഡ് (BWSSB) നടപടി തുടങ്ങി. അപ്പാർട്മെന്റ് സമുച്ചയങ്ങളിലേക്ക് ജലം എത്തിക്കുന്നതിനായി അപ്പാർട്മെന്റ് അസോസിയേഷൻ പ്രതിനിധികളുമായി ബിഡബ്ല്യുഎസ്എസ്ബി ധാരണാപത്രം ഒപ്പുവച്ചു.
ബിഡബ്ല്യുഎസ്എസ്ബി ചെയർപേഴ്സൺ എൻ. മഞ്ജുളയുടെ നേതൃത്വത്തിലാണ് പദ്ധതി മുന്നോട്ട് കൊണ്ടുപോകുന്നത്. കുഴൽക്കിണറുകൾ വറ്റിയതോടെ നഗരത്തിലെ നിരവധി അപ്പാർട്മെന്റുകൾ സ്വകാര്യ ജലടാങ്കറുകളെ ആശ്രയിക്കേണ്ടി വന്നിരുന്നു. ഈ സാഹചര്യം മുതലെടുത്ത് ചില ടാങ്കർ ഉടമകൾ ഉയർന്ന നിരക്ക് ഈടാക്കുന്നുവെന്ന പരാതികളെത്തുടർന്നാണ് സർക്കാർ നിയന്ത്രിത സേവനം ശക്തമാക്കുന്നത്.
ബിഡബ്ല്യുഎസ്എസ്ബിയുടെ സഞ്ചാരി കാവേരി ടാങ്കറുകൾ നിശ്ചിത നിരക്കിലാണ് ജലം വിതരണം ചെയ്യുന്നത്. 4,000 മുതൽ 12,000 ലിറ്റർ വരെ ശേഷിയുള്ള ടാങ്കറുകളാണ് നിലവിൽ സേവനത്തിനായി ഉപയോഗിക്കുന്നത്. ഉപഭോക്താക്കൾക്ക് സഞ്ചാരി ആപ്പ് വഴി ടാങ്കർ ബുക്ക് ചെയ്യാനും കഴിയും.
അപ്പാർട്മെന്റുകളിലെ ജലക്ഷാമം പരിഹരിക്കാനും സ്വകാര്യ ടാങ്കറുകളെ ആശ്രയിക്കുന്ന സാഹചര്യം കുറയ്ക്കാനുമാണ് പദ്ധതിയിലൂടെ ലക്ഷ്യമിടുന്നത്.
