മധ്യപ്രദേശ് മുഖ്യമന്ത്രി മോഹൻ യാദവിൻ്റെ വസതിയിലേക്ക് 2,000-ത്തിലധികം കർഷകർ മാർച്ച് നടത്തി. പച്ചപ്പയർ വിളയുടെ 100 ശതമാനം സർക്കാർ സംഭരണവും താങ്ങുവില ഉറപ്പാക്കുന്നതും ഉൾപ്പെടെയുള്ള ആവശ്യങ്ങൾ ഉന്നയിച്ചാണ് കർഷകർ ഭോപ്പാലിൽ പ്രതിഷേധവുമായി രംഗത്തെത്തിയത്.
സംയുക്ത കിസാൻ മോർച്ചയുടെ നേതൃത്വത്തിൽ വിവിധ ജില്ലകളിൽ നിന്നെത്തിയ കർഷകർ പൊലീസ് ബാരിക്കേഡുകൾ മറികടന്ന് മുഖ്യമന്ത്രിയുടെ വസതിയിലേക്ക് നീങ്ങാൻ ശ്രമിച്ചു. തുടർന്ന് നഗരത്തിൽ കനത്ത സുരക്ഷ ഏർപ്പെടുത്തുകയും ഗതാഗതത്തിന് വ്യാപക നിയന്ത്രണങ്ങൾ ഏർപ്പെടുത്തുകയും ചെയ്തു.
പച്ചപ്പയർ വിളയുടെ മുഴുവൻ ഉൽപ്പാദനവും താങ്ങുവിലയ്ക്ക് സർക്കാർ വാങ്ങുക, വള വിതരണ സംവിധാനം മെച്ചപ്പെടുത്തുക, ഇ-ടോക്കൺ സംവിധാനത്തിൽ മാറ്റം വരുത്തുക തുടങ്ങിയ ആവശ്യങ്ങളാണ് കർഷകർ ഉന്നയിക്കുന്നത്. ആവശ്യങ്ങൾ അംഗീകരിക്കുന്നതുവരെ പ്രതിഷേധം തുടരുമെന്നാണ് കർഷക സംഘടനകളുടെ നിലപാട്.
കർഷകരുമായി സർക്കാർ നടത്തിയ പ്രാഥമിക ചർച്ചകൾ ധാരണയില്ലാതെ അവസാനിച്ചതോടെ പ്രതിഷേധം കൂടുതൽ ശക്തമാകുമെന്ന ആശങ്ക ഉയർന്നിട്ടുണ്ട്. സ്ഥിതിഗതികൾ വിലയിരുത്താൻ സംസ്ഥാന സർക്കാർ മന്ത്രിസമിതിയിലെ അംഗങ്ങൾ ഉൾപ്പെട്ട സമിതിയെ നിയോഗിച്ചതായും റിപ്പോർട്ടുകളുണ്ട്.
