ബെംഗളൂരുവിലെ ഫ്രീഡം പാർക്കിൽ നടന്ന നീറ്റ് ചോദ്യപേപ്പർ ചോർച്ച വിരുദ്ധ പ്രതിഷേധത്തിനിടെ പ്രധാനമന്ത്രി നരേന്ദ്ര മോദിക്കെതിരെ അപകീർത്തികരവും അധിക്ഷേപകരവുമായ വീഡിയോ സമൂഹമാധ്യമത്തിൽ പങ്കുവെച്ചെന്ന പരാതിയിൽ 21-കാരനായ യുവാവിനെ ബെംഗളൂരു പൊലീസ് അറസ്റ്റ് ചെയ്തു.
അറസ്റ്റിലായ യുവാവ് നഗരത്തിൽ ബിരിയാണി വിൽപ്പന നടത്തി ഉപജീവനം നടത്തുന്നയാളാണെന്ന് പൊലീസ് അറിയിച്ചു. പ്രതിഷേധത്തിനിടെ പകർത്തിയ വീഡിയോ ഇൻസ്റ്റഗ്രാമിൽ റീൽ രൂപത്തിൽ പങ്കുവെച്ചതായും, അതിൽ പ്രധാനമന്ത്രിക്കെതിരെ അധിക്ഷേപകരമായ പരാമർശങ്ങളും അശ്ലീല ഭാഷയും ഉപയോഗിച്ചതായും അന്വേഷണത്തിൽ കണ്ടെത്തി.
വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചതിനെ തുടർന്ന് ബിജെപി പ്രവർത്തകർ പൊലീസിൽ പരാതി നൽകുകയായിരുന്നു. പരാതിയുടെ അടിസ്ഥാനത്തിൽ കേസെടുത്ത ബെംഗളൂരു പൊലീസ്, വീഡിയോയുടെ ഉറവിടം കണ്ടെത്തി യുവാവിനെ അറസ്റ്റ് ചെയ്യുകയായിരുന്നു.
യുവാവിൻ്റെ മൊബൈൽ ഫോൺ ഉൾപ്പെടെയുള്ള ഡിജിറ്റൽ ഉപകരണങ്ങൾ പൊലീസ് പിടിച്ചെടുത്തിട്ടുണ്ട്. വീഡിയോ മറ്റാർക്കെങ്കിലും പങ്കുവെച്ചിട്ടുണ്ടോ, ഇതിന് പിന്നിൽ മറ്റാരുടെയെങ്കിലും പങ്കുണ്ടോയെന്നതടക്കമുള്ള കാര്യങ്ങളും സൈബർ വിഭാഗത്തിൻ്റെ സഹായത്തോടെ പരിശോധിച്ചുവരികയാണ്.
പ്രതിയെ കോടതിയിൽ ഹാജരാക്കിയ ശേഷം തുടർനടപടികൾ സ്വീകരിക്കുമെന്ന് പൊലീസ് അറിയിച്ചു. പ്രതിഷേധങ്ങളുടെ പേരിൽ സമൂഹമാധ്യമങ്ങളിലൂടെ വിദ്വേഷമോ അധിക്ഷേപകരമോ ആയ ഉള്ളടക്കം പ്രചരിപ്പിക്കുന്നവർക്കെതിരെ നിയമനടപടി തുടരുമെന്നും ബെംഗളൂരു പൊലീസ് മുന്നറിയിപ്പ് നൽകി.
