ഇന്ത്യയുടെ സ്വകാര്യ ബഹിരാകാശ രംഗത്ത് ചരിത്രനേട്ടമാകുന്ന വിക്രം-1 റോക്കറ്റിൻ്റെ വിക്ഷേപണത്തിനുള്ള ഒരുക്കങ്ങൾ അന്തിമഘട്ടത്തിലേക്ക്. ദൗത്യത്തിൻ്റെ ആദ്യഘട്ടമായി റോക്കറ്റ് വിക്ഷേപണത്തറയിൽ വിജയകരമായി സ്ഥാപിച്ചു. ഹൈദരാബാദ് ആസ്ഥാനമായുള്ള റൂട്ട് എയറോസ്പേസ് വികസിപ്പിച്ച വിക്രം-1 ഇന്ത്യയിൽ സ്വകാര്യ മേഖല പൂർണമായും നിർമിച്ച ആദ്യ ഓർബിറ്റൽ റോക്കറ്റാണ്.
ചെറിയ ഉപഗ്രഹങ്ങളെ ഭൂമിയുടെ താഴ്ന്ന ഭ്രമണപഥത്തിലെത്തിക്കാൻ ശേഷിയുള്ള മൾട്ടി-സ്റ്റേജ് റോക്കറ്റാണ് വിക്രം-1. ഇന്ത്യൻ ബഹിരാകാശ പദ്ധതിയുടെ പിതാവായ ഡോ.വിക്രം സാരാഭായിയുടെ സ്മരണാർഥമാണ് റോക്കറ്റിന് ‘വിക്രം’ എന്ന പേര് നൽകിയിരിക്കുന്നത്.
ചന്ദ്രയാൻ, മംഗൾയാൻ തുടങ്ങിയ ഇന്ത്യയുടെ ചരിത്ര ദൗത്യങ്ങൾക്ക് സാക്ഷ്യം വഹിച്ച ഐഎസ്ആർഒയുടെ വിക്ഷേപണത്തറയിൽ സ്വകാര്യ മേഖല രൂപകൽപ്പന ചെയ്ത് നിർമ്മിച്ച ഓർബിറ്റൽ റോക്കറ്റ് വിക്ഷേപണത്തിനൊരുങ്ങുന്നത് ഇതാദ്യമാണ്. റോക്കറ്റിൻ്റെ പ്രധാന ഘടകങ്ങൾ അത്യാധുനിക ക്രെയിനുകളുടെ സഹായത്തോടെ ഉയർത്തി വിക്ഷേപണത്തറയിൽ മില്ലിമീറ്റർ കൃത്യതയോടെ ഘടിപ്പിക്കുന്ന ദൃശ്യങ്ങളും റൂട്ട് എയറോസ്പേസ് പുറത്തുവിട്ടിട്ടുണ്ട്.
റോക്കറ്റ് സ്റ്റാക്കിംഗ് വിജയകരമായി പൂർത്തിയായതോടെ ഇനി ഇലക്ട്രിക്കൽ, മെക്കാനിക്കൽ സംവിധാനങ്ങളുടെ അന്തിമ പരിശോധനകളും ഇന്ധനം നിറയ്ക്കാനുള്ള നടപടികളും പൂർത്തിയാക്കിയ ശേഷമായിരിക്കും കൗണ്ട്ഡൗൺ ആരംഭിക്കുക.
2022-ൽ വിക്രം-എസ് റോക്കറ്റിൻ്റെ വിജയകരമായ വിക്ഷേപണത്തിലൂടെ ശ്രദ്ധ നേടിയ റൂട്ട് എയറോസ്പേസിൻ്റെ ഏറ്റവും വലിയ വാണിജ്യ ദൗത്യമാണ് വിക്രം-1. ഈ വിക്ഷേപണം വിജയകരമായാൽ ആഗോള വാണിജ്യ ബഹിരാകാശ രംഗത്ത് ഇന്ത്യൻ സ്വകാര്യ കമ്പനികളുടെ സാന്നിധ്യം കൂടുതൽ ശക്തിപ്പെടുമെന്നാണ് വിലയിരുത്തൽ.
