വെനസ്വേലയെ നടുക്കിയ ഇരട്ട ഭൂചലനങ്ങളിൽ മരണസംഖ്യ 164 ആയി ഉയർന്നു. 971 പേർക്ക് പരിക്കേറ്റതായും രക്ഷാപ്രവർത്തനങ്ങൾ തുടരുന്നതിനാൽ മരണസംഖ്യ ഇനിയും വർധിക്കാനിടയുണ്ടെന്നും ആക്ടിംഗ് പ്രസിഡന്റ് ഡെൽസി റോഡ്രിഗസ് അറിയിച്ചു.
മിനിറ്റുകളുടെ ഇടവേളയിൽ റിക്ടർ സ്കെയിലിൽ 7.2, 7.5 തീവ്രത രേഖപ്പെടുത്തിയ രണ്ട് ശക്തമായ ഭൂചലനങ്ങളാണ് രാജ്യത്തെ ബാധിച്ചത്. നൂറ് വർഷത്തിനിടെ വെനസ്വേലയിൽ അനുഭവപ്പെട്ട ഏറ്റവും ശക്തമായ ഭൂചലനങ്ങളിലൊന്നായാണ് ഇത് വിലയിരുത്തപ്പെടുന്നത്.
ഭൂചലനത്തെ തുടർന്ന് തലസ്ഥാനമായ കാരക്കാസ് ഉൾപ്പെടെ വിവിധ നഗരങ്ങളിൽ നിരവധി കെട്ടിടങ്ങൾ തകർന്നുവീണു. വ്യാപക നാശനഷ്ടങ്ങളും വൈദ്യുതി തടസങ്ങളും റിപ്പോർട്ട് ചെയ്തിട്ടുണ്ട്. സൈമൺ ബൊളിവർ അന്താരാഷ്ട്ര വിമാനത്താവളം താൽക്കാലികമായി അടച്ചതോടൊപ്പം സബ്‌വേ സർവീസുകളും നിർത്തിവെച്ചു.
സ്ഥിതിഗതികൾ ഗുരുതരമായതിനെ തുടർന്ന് രാജ്യത്ത് അടിയന്തരാവസ്ഥ പ്രഖ്യാപിച്ചു. സ്കൂളുകൾക്ക് താൽക്കാലിക അവധി നൽകിയിരിക്കുകയാണ്. ചില വിദ്യാഭ്യാസ സ്ഥാപനങ്ങൾ ദുരിതാശ്വാസ ക്യാമ്പുകളായും സഹായ വിതരണ കേന്ദ്രങ്ങളായും പ്രവർത്തിക്കുമെന്ന് അധികൃതർ അറിയിച്ചു.
