ബാംഗ്ലൂർ മഡിവാളയിൽ മലയാളി പെൺകുട്ടി പീഡനത്തിന് ഇരയായ സംഭവത്തിൽ നിർണായക തെളിവുകൾ പുറത്ത്. പ്രതിയായ സുൽത്താൻ ബത്തേരി സ്വദേശി ഹൈനസ്, പെൺകുട്ടിയോടും സുഹൃത്തുക്കളോടും കുറ്റം സമ്മതിച്ച് മാപ്പ് പറയുന്നതിന്‍റെ ദൃശ്യങ്ങൾ പുറത്തുവന്നു. സംഭവം വാർത്തയായതോടെ കർണാടക പോലീസ് വിഷയത്തിൽ ഇടപെട്ടു. ഡിസിപിയെ കമ്മീഷണർ നേരിട്ട് വിളിപ്പിച്ച് കേസെടുക്കാൻ വൈകിയതിൽ വിശദീകരണം തേടിയിരിക്കുകയാണ്. പുതിയ എഫ്ഐആർ രജിസ്റ്റർ ചെയ്യാൻ നിർദേശം നൽകിയിട്ടുണ്ട്.
കേസ് മഡിവാളയിൽ നിന്നും ആടുഗോഡി പോലീസ് സ്റ്റേഷനിലേക്ക് മാറ്റുകയും ആഡുഗോഡി എസിപിക്ക് അന്വേഷണത്തിന്‍റെ ചുമതല നൽകുകയും ചെയ്‌തു. കേസെടുക്കുന്നതിൽ വീഴ്ച വരുത്തിയ മഡിവാള പോലീസിനെതിരെ നടപടി ഉണ്ടാകുമെന്നും പരാതിക്കാരിക്ക് ഉറപ്പ് ലഭിച്ചു. ഹൈനസ് കേരളത്തിലേക്ക് കടന്നതായാണ് സൂചന. കർണാടക പൊലീസ് സംഘം അന്വേഷണത്തിനായി കേരളത്തിലെത്തിയിട്ടുണ്ട്.
