ബെംഗളൂരുവിലെ പിജി(പേയിംഗ് ഗസ്റ്റ്)കളിൽ നിന്ന് ലാപ്‌ടോപ്പുകൾ മോഷ്ടിച്ച കേസിൽ തമിഴ്‌നാട്ടിൽ നിന്നുള്ള രണ്ട് പേരെ അറസ്റ്റ് ചെയ്തു. ഏകദേശം 40 ലക്ഷം രൂപ വിലമതിക്കുന്ന 48 ലാപ്‌ടോപ്പുകൾ കണ്ടെടുത്തതായും ബെംഗളൂരു പോലീസ് അറിയിച്ചു. ലാപ്‌ടോപ്പ് സർവീസ് ടെക്‌നീഷ്യനായ ഗൗതം (30), ഓട്ടോറിക്ഷ ഡ്രൈവറായ രാജദൊരൈ (33) എന്നിവരെയാണ് പോലീസ് അറസ്റ്റ് ചെയ്‌തത്‌.
ഇലക്ട്രോണിക് സിറ്റി പോലീസ് സ്റ്റേഷൻ പരിധിയിലുള്ള ഒരു പിജി സ്ഥാപനത്തിലെ താമസക്കാരൻ പരാതി നൽകിയതോടെയാണ് കേസ് പുറത്തുവന്നത്. നവംബർ 28ന് തൻ്റെയും സുഹൃത്തുക്കളുടെയും മൂന്ന് ലാപ്‌ടോപ്പുകൾ മോഷ്ടിച്ചതായി അദ്ദേഹം പോലീസിൽ പരാതിപ്പെട്ടിരുന്നു. ഇതിൻ്റെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. പോലീസ് ചുറ്റുമുള്ള പ്രദേശങ്ങളിലെ സിസിടിവി ദൃശ്യങ്ങൾ പരിശോധിക്കുകയും പ്രതികളെ കണ്ടെത്തുന്നതിനായി ചിലരിൽനിന്ന് വിവരങ്ങൾ ശേഖരിച്ചതായും ഉദ്യോഗസ്ഥർ പറഞ്ഞു.
പോലീസ് രാജദൊരൈയെ തമിഴ്‌നാട്ടിൽനിന്നാണ് കസ്റ്റഡിയിലെടുത്തത്. ഇലക്ട്രോണിക് സിറ്റിയിൽ റിപ്പോർട്ട് ചെയ്ത മോഷണം നടത്തിയതായി അയാൾ സമ്മതിച്ചതായും ബെംഗളൂരുവിൻ്റെ വിവിധ ഭാഗങ്ങളിലുള്ള പിജി സൗകര്യങ്ങളിൽ നിന്ന് ഒന്നിലധികം ലാപ്‌ടോപ്പ് മോഷ്ടിച്ചതിൽ തനിക്ക് പങ്കുണ്ടെന്ന് വെളിപ്പെടുത്തിയതായും പോലീസ് പറഞ്ഞു. ഇയാളെ കൂടുതൽ ചോദ്യം ചെയ്തതിൽ നിന്നാണ് ഗൗതമിലേക്ക് പോലീസിനെ എത്തിച്ചത്. മോഷ്ടിച്ച ഉപകരണങ്ങൾ രാജദൊരൈ ഗൗതമിന് കൈമാറുമെന്നും, തുടർന്ന് അദ്ദേഹം അവ റീഫോർമാറ്റ് ചെയ്ത് പുതുക്കിപ്പണിത് വിൽക്കുകയായിരുന്നുവെന്നും പോലീസ് പറഞ്ഞു. മോഷ്ടിച്ച നിരവധി ലാപ്‌ടോപ്പുകൾ ഇതിനകം തന്നെ ഇത്തരത്തിൽ വിറ്റഴിക്കപ്പെട്ടിട്ടുണ്ടെന്നും ആ ഉപകരണങ്ങൾ കണ്ടെത്തി വീണ്ടെടുക്കാനുള്ള ശ്രമങ്ങൾ നടന്നുവരികയാണെന്നും പോലീസ് പറഞ്ഞു.
