ഇന്ത്യയുടെ സൈനിക ചരിത്രത്തിലെ അഭിമാന അധ്യായമായ കാർഗിൽ യുദ്ധവിജയത്തിന് ഇന്ന് 27 വർഷം. രാജ്യത്തിനായി ജീവൻ ബലിയർപ്പിച്ച ധീരസൈനികരുടെ ത്യാഗം അനുസ്മരിച്ച് രാജ്യം ഇന്ന് 27-ാമത് കാർഗിൽ വിജയ് ദിവസ് ആചരിക്കുകയാണ്. ലഡാക്കിലെ ദ്രാസിലുള്ള കാർഗിൽ യുദ്ധസ്മാരകത്തിൽ നടക്കുന്ന മുഖ്യചടങ്ങിൽ പ്രതിരോധമന്ത്രി രാജ്നാഥ് സിങ് മുഖ്യാതിഥിയാകും. യുദ്ധത്തിൽ വീരമൃത്യു വരിച്ച സൈനികരുടെ കുടുംബാംഗങ്ങളെയും ചടങ്ങിൽ ആദരിക്കും.
1999 മെയ് 10-ന് ആരംഭിച്ച കാർഗിൽ യുദ്ധം ജൂലൈ 26-നാണ് ഇന്ത്യയുടെ വിജയത്തോടെ അവസാനിച്ചത്. പാകിസ്ഥാൻ സൈന്യവും നുഴഞ്ഞുകയറ്റക്കാരും നിയന്ത്രണരേഖ മറികടന്ന് കാർഗിൽ മേഖലയിലെ തന്ത്രപ്രധാന മലനിരകൾ കൈയടക്കിയതോടെയാണ് യുദ്ധം ആരംഭിച്ചത്. ദ്രാസ് മേഖലയിലെ ആട്ടിടയൻ താഷി നാംഗ്യാൽ നുഴഞ്ഞുകയറ്റക്കാരെ ആദ്യം കണ്ടെത്തി സൈന്യത്തെ വിവരം അറിയിച്ചതാണ് നിർണായക വഴിത്തിരിവായത്.
തുടർന്ന് പട്രോളിംഗിനിറങ്ങിയ ക്യാപ്റ്റൻ സൗരഭ് കാലിയയുടെ നേതൃത്വത്തിലുള്ള സംഘം പാക് സൈന്യത്തിൻ്റെ പിടിയിലാകുകയും ക്രൂരമായി കൊല്ലപ്പെടുകയും ചെയ്ത സംഭവം രാജ്യത്തെ നടുക്കി. പിന്നീട് ഇന്ത്യൻ സൈന്യം ‘ഓപ്പറേഷൻ വിജയ്’ ആരംഭിച്ച് ശക്തമായ തിരിച്ചടി നൽകി.
ഏകദേശം രണ്ട് ലക്ഷം സൈനികരെ അണിനിരത്തിയ സൈനിക നീക്കത്തിൽ 30,000-ത്തിലധികം സൈനികർ യുദ്ധമുന്നണിയിൽ വിന്യസിക്കപ്പെട്ടു. ബോഫോഴ്സ് പീരങ്കികൾ, മിറാഷ്-2000 യുദ്ധവിമാനങ്ങൾ എന്നിവയുടെ പിന്തുണയോടെ ടോളോലിംഗ്, ടൈഗർ ഹിൽ ഉൾപ്പെടെയുള്ള തന്ത്രപ്രധാന കൊടുമുടികൾ ഇന്ത്യൻ സൈന്യം തിരിച്ചുപിടിച്ചു.
കടുത്ത പോരാട്ടത്തിനൊടുവിൽ പാകിസ്ഥാൻ പിന്മാറാൻ നിർബന്ധിതരാവുകയും 1999 ജൂലൈ 26-ന് ഇന്ത്യ വിജയപ്രഖ്യാപനം നടത്തുകയും ചെയ്തു. യുദ്ധത്തിൽ 527 ഇന്ത്യൻ സൈനികർ വീരമൃത്യു വരിക്കുകയും ആയിരത്തിലധികം പേർക്ക് പരിക്കേൽക്കുകയും ചെയ്തു.
രാജ്യത്തിൻ്റെ അഖണ്ഡതയ്ക്കും പരമാധികാരത്തിനുമായി ജീവൻ സമർപ്പിച്ച ധീരസൈനികരുടെ ധൈര്യവും ത്യാഗവും സ്മരിച്ചുകൊണ്ടാണ് രാജ്യം ഇന്ന് കാർഗിൽ വിജയ് ദിവസ് ആചരിക്കുന്നത്.
