കെംപെഗൗഡ അന്താരാഷ്ട്ര വിമാനത്താവളത്തിൽ യാത്രക്കാരുടെ ബാഗേജ് ട്രോളികൾ ഉപയോഗിച്ച് സ്വർണം കടത്താനുള്ള ശ്രമം ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡി.ആർ.ഐ.) അധികൃതർ പരാജയപ്പെടുത്തി. സംഭവവുമായി ബന്ധപ്പെട്ട് ക്വാലാലംപൂരിൽനിന്നെത്തിയ രണ്ട് യാത്രക്കാരെ അറസ്റ്റ് ചെയ്തു. ഇവരിൽനിന്ന് 1.2 കിലോഗ്രാം സ്വർണവും കടത്തിന് ഉപയോഗിച്ച ട്രോളികളും മറ്റ് വസ്തുക്കളും പിടിച്ചെടുത്തു. വ്യാഴാഴ്ച പുറത്തുവന്ന റിപ്പോർട്ടുകൾ പ്രകാരം, പിടിച്ചെടുത്ത സ്വർണത്തിന് 1,78,88,360 രൂപ വിലവരും. 24 കാരറ്റ് പരിശുദ്ധിയുള്ള 12 സ്വർണക്കട്ടികളാണ് രണ്ട് പാക്കറ്റുകളിലായി ഒളിപ്പിച്ചിരുന്നത്. ആകെ 1,200.40 ഗ്രാം തൂക്കമുള്ള സ്വർണത്തിന് 999.9 പരിശുദ്ധിയുണ്ടെന്ന് ഡി.ആർ.ഐ. അറിയിച്ചു.
ട്രോളിയുടെ അടിയിൽ സ്വർണം ഒളിപ്പിച്ചു
കസ്റ്റംസ് പരിശോധന മറികടക്കുന്നതിനായി വ്യത്യസ്തമായ രീതിയാണ് പ്രതികൾ സ്വീകരിച്ചതെന്നാണ് അന്വേഷണ ഏജൻസിയുടെ വിശദീകരണം. വിമാനത്താവളത്തിലെ ബാഗേജ് ട്രോളികളുടെ അടിഭാഗത്ത് സ്വർണം അടങ്ങിയ പാക്കറ്റുകൾ ഒട്ടിച്ചുവെച്ചശേഷം ഇവർ അവിടെനിന്ന് മാറുകയായിരുന്നു. തുടർന്ന് മറ്റ് യാത്രക്കാർ ഈ ട്രോളികൾ ഉപയോഗിച്ച് ലഗേജുമായി കസ്റ്റംസ് നിയന്ത്രണ മേഖലയ്ക്ക് പുറത്തേക്ക് കടക്കുമ്പോൾ സ്വർണം തിരികെ കൈക്കലാക്കുകയായിരുന്നു ലക്ഷ്യമെന്നാണ് പ്രാഥമിക വിവരം.
പ്രത്യേക രഹസ്യവിവരത്തിൻ്റെ അടിസ്ഥാനത്തിൽ ഡി.ആർ.ഐ. ഉദ്യോഗസ്ഥർ രണ്ട് യാത്രക്കാരെയും നിരീക്ഷിച്ചുവരികയായിരുന്നു. ട്രോളികളുടെ അടിയിൽ പാക്കറ്റുകൾ ഒട്ടിക്കുന്നതും പിന്നീട് അവയിൽനിന്ന് മാറിനിൽക്കുന്നതും ശ്രദ്ധയിൽപ്പെട്ടതോടെ ഉദ്യോഗസ്ഥർ ഇടപെട്ട് സ്വർണം പിടിച്ചെടുക്കുകയായിരുന്നു.
കടത്തിന് പിന്നിലെ ശൃംഖല തേടി അന്വേഷണം
സംഭവത്തിൽ അറസ്റ്റിലായവരുടെ പേരുവിവരങ്ങൾ അന്വേഷണ ഏജൻസി പുറത്തുവിട്ടിട്ടില്ല. സ്വർണക്കടത്തിന് പിന്നിൽ പ്രവർത്തിക്കുന്ന മറ്റ് വ്യക്തികളെയും ശൃംഖലയെയും കണ്ടെത്തുന്നതിനുള്ള അന്വേഷണം തുടരുകയാണ്. കസ്റ്റംസ് പരിശോധനയ്ക്കിടെ സ്വർണം നേരിട്ട് കൈവശം വയ്ക്കാതെ വിമാനത്താവളത്തിലെ ട്രോളികൾ ഉപയോഗിച്ച് കടത്താൻ ശ്രമിച്ച രീതി പുതിയതും വ്യത്യസ്തവുമാണെന്ന് അന്വേഷണവുമായി ബന്ധപ്പെട്ട വൃത്തങ്ങൾ വ്യക്തമാക്കി.
