ബന്ധുവിന്‍റെ വിവാഹത്തിൽ വസ്ത്രങ്ങൾ വാങ്ങാൻ കടയിൽ പോയ യുവതിയുടെ ലക്ഷങ്ങൾ വിലമതിക്കുന്ന സ്വർണാഭരണങ്ങളും 20,000 രൂപയും കവർന്നു. ഏഴ് ലക്ഷം രൂപ വിലവരുന്ന സ്വർണാഭരണങ്ങളും 20,000 രൂപയുമാണ് മോഷണം പോയത്. മന്ത്രാലയ സ്വദേശിനി ചന്ദ്രികയുടെ സ്വർണവും പണവുമാണ് ബാംഗ്ലൂർ ചിക്ക്പേട്ട് മാർക്കറ്റിൽ വച്ച് നഷ്ടപ്പെട്ടത്. ചന്ദ്രികയുടെ സഹോദരനും കൂടെയുണ്ടായിരുന്നു.
ചിക്കപേട്ടിലെ തിരക്ക്കണ്ട് ചന്ദ്രിക ധരിച്ചിരുന്ന സ്വർണാഭരങ്ങൾ അഴിച്ച് ബാഗിനുള്ളിലെ പേഴ്‌സിൽ സൂക്ഷിച്ചു. 20,000 രൂപയും പേഴ്‌സിൽ ഉണ്ടായിരുന്നു. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചു. അവന്യൂ റോഡിന് സമീപം നടന്നുപോകുമ്പോൾ ഒരു കൂട്ടം യുവാക്കൾ ചന്ദ്രികയുടെ അരികിലെത്തി തിരക്കുണ്ടാക്കിയിരുന്നു. പെട്ടെന്ന്തന്നെ സംഭവസ്ഥലത്ത് നിന്ന് യുവാക്കൾ രക്ഷപ്പെടുകയും ചെയ്തു. ഇതിൽ സംശയം തോന്നിയ ചന്ദ്രിക ബാഗ് പരിശോധിച്ചപ്പോഴാണ് പേഴ്‌സ് നഷ്ടപ്പെട്ട കാര്യം അറിയുന്നത്. ബാഗ് മുറിച്ചാണ് മോഷ്ടാക്കൾ കവർച്ച നടത്തിയത്.
