ഉത്തരാഖണ്ഡിലെ ലിപുലേഖ് ചുരം വഴിയുള്ള അതിർത്തി വ്യാപാരം ജൂണിൽ പുനരാരംഭിക്കാൻ ചൈനയും ഇന്ത്യയും തമ്മിൽ തീരുമാനിച്ചതായി റിപ്പോർട്ട്. ഉത്തരാഖണ്ഡിലെ പിത്തോറഗഡ് ജില്ലയിലുള്ള ലിപുലേഖ് ചുരം വഴിയാണ് വ്യാപാരം വീണ്ടും ആരംഭിക്കുന്നതിനുള്ള പദ്ധതികൾ ചൈനയും ഇന്ത്യയും ആലോചിക്കുന്നത്.
2020 ൽ ഗാൽവൻ താഴ്‌വരയിലെ സംഘർഷത്തെത്തുടർന്നുണ്ടായ നയതന്ത്ര പ്രശ്നങ്ങൾ കാരണം 2019 മുതൽ കഴിഞ്ഞ 6 വർഷമായി ഈ പാത വഴിയുള്ള വ്യാപാരം നിർത്തിവച്ചിരിക്കുകയായിരുന്നു. ഉത്തരാഖണ്ഡ് ചീഫ് സെക്രട്ടറിക്ക് വിദേശകാര്യ സെക്രട്ടറി വിക്രം മിസ്രി അയച്ച കത്തിൽ ആഭ്യന്തര മന്ത്രാലയവും വാണിജ്യ മന്ത്രാലയവും ഇതിന് അനുമതി നൽകിയതായി വ്യക്തമാക്കി.
ജൂൺ മുതൽ സെപ്റ്റംബർ വരെയാണ് ഈ വ്യാപാര സീസൺ സാധാരണയായി നടക്കാറുള്ളത്. സമുദ്രനിരപ്പിൽ നിന്ന് 17,000 അടി ഉയരത്തിൽ സ്ഥിതി ചെയ്യുന്ന ലിപുലേഖ് ചുരം വഴിയുള്ള വ്യാപാരം പ്രധാനമായും പ്രാദേശിക ഹിമാലയൻ ഉത്പന്നങ്ങളുടെ കൈമാറ്റത്തിലാണ് കേന്ദ്രീകരിച്ചിരിക്കുന്നത്.
1954 ൽ ആരംഭിച്ച ഈ വ്യാപാരം 1962 ലെ യുദ്ധത്തെത്തുടർന്ന് തടസപ്പെട്ടെങ്കിലും 1992ൽ വീണ്ടും പുനരാരംഭിച്ചിരുന്നു. ഏകദേശം 6.55 കോടി രൂപയുടെ ഇടപാടുകളാണ് 2018 ലെ കണക്കുകൾ പ്രകാരം ഇവിടെ നടന്നത്. ഇതിൽ 96.5 ലക്ഷം രൂപയുടെ ഇന്ത്യൻ കയറ്റുമതിയും 5.59 കോടി രൂപയുടെ ചൈനീസ് ഇറക്കുമതിയും ഉൾപ്പെടുന്നു.
