ബാങ്ക് ജീവനക്കാർ സെപ്റ്റംബർ 28 മുതൽ 30 വരെ നടത്താനിരുന്ന മൂന്ന് ദിവസത്തെ പണിമുടക്ക് പിൻവലിച്ചു. ബാങ്ക് യൂണിയനുകളുടെ കൂട്ടായ്മയായ യുണൈറ്റഡ് ഫോറം ഓഫ് ബാങ്ക് യൂണിയൻസ് (യുഎഫ്ബിയു) ആണ് സമരം മാറ്റിവച്ചതായി അറിയിച്ചത്. ഇന്ത്യൻ ബാങ്ക്സ് അസോസിയേഷനുമായി (ഐബിഎ) നടത്തിയ ചർച്ചയ്ക്ക് പിന്നാലെയാണ് തീരുമാനം. ആഴ്ചയിൽ അഞ്ച് ദിവസം മാത്രം ബാങ്കുകൾ പ്രവർത്തിക്കുന്ന രീതിയിലേക്ക് മാറ്റണമെന്ന ജീവനക്കാരുടെ പ്രധാന ആവശ്യം പഠിക്കാൻ ഐബിഎയും യുഎഫ്ബിയുവും ചേർന്ന് ഉന്നതതല സമിതി രൂപീകരിക്കാൻ ധാരണയായി. ഉപഭോക്താക്കൾക്ക് ബുദ്ധിമുട്ടുണ്ടാകാത്ത തരത്തിൽ വിഷയത്തിൽ പരിഹാരം കണ്ടെത്തുന്നതിനുള്ള സാധ്യതകൾ സമിതി പരിശോധിക്കും.
പെൻഷൻ പരിഷ്കരണം, എൻപിഎസ് ജീവനക്കാർക്ക് പഴയ പെൻഷൻ പദ്ധതിയിലേക്ക് മാറാനുള്ള അവസരം തുടങ്ങിയ ആവശ്യങ്ങളും ബാങ്ക് ജീവനക്കാർ ഉന്നയിച്ചിട്ടുണ്ട്. ഈ വിഷയങ്ങളിൽ വേഗത്തിൽ പരിഹാരം കാണാമെന്ന ഉറപ്പ് ലഭിച്ചതായും യൂണിയനുകൾ അറിയിച്ചു. മൂന്ന് ദിവസത്തെ പണിമുടക്ക് പ്രഖ്യാപിച്ചിരുന്നതിനാൽ ഞായറാഴ്ചയും രാജ്യത്തെ ബാങ്കുകൾ തുറന്ന് പ്രവർത്തിച്ചിരുന്നു. സമരം പിൻവലിച്ചതോടെ ഇന്ന് ബാങ്കുകളുടെ പ്രവർത്തനം സാധാരണ നിലയിൽ തുടരും.
