നഗരത്തിലെ 5-സ്റ്റാർ ഹോട്ടലിൽ രണ്ട് പെൺമക്കളെ കൊലപ്പെടുത്തിയ ശേഷം പിതാവ് ജീവനൊടുക്കാൻ ശ്രമിച്ച സംഭവത്തിൽ കൂടുതൽ വിവരങ്ങൾ പുറത്ത്. ഭാര്യയ്ക്ക് അവിഹിതബന്ധമുണ്ടെന്ന സംശയവും കുടുംബപ്രശ്നങ്ങളുമാണ് കൊലപാതകത്തിന് പിന്നിലെന്നാണ് പൊലീസിൻ്റെ പ്രാഥമിക നിഗമനം. നാഗവാര മെയിൻ റോഡിന് സമീപമുള്ള ബിലാൽനഗർ സ്വദേശി 40കാരനായ എസ്.ജി.ഇമ്രാനാണ് 10ഉം 5ഉം വയസ്സുള്ള പെൺമക്കളുമായി ഹോട്ടലിൽ മുറിയെടുത്തത്. തുടർന്ന് കുട്ടികളെ ശ്വാസംമുട്ടിച്ച് കൊലപ്പെടുത്തിയ ശേഷം ടോയ്‌ലറ്റിൽവച്ച് കഴുത്തറുത്ത് ജീവനൊടുക്കാൻ ശ്രമിച്ചതായാണ് പൊലീസ് പറയുന്നത്. ഗുരുതരമായി പരിക്കേറ്റ ഇമ്രാൻ ആശുപത്രിയിൽ ചികിത്സയിലാണ്.
സംഭവത്തിന് പിന്നാലെ പൊലീസ് നടത്തിയ പരിശോധനയിൽ ഒരു ആത്മഹത്യാക്കുറിപ്പ്
കണ്ടെത്തിയതായാണ് റിപ്പോർട്ട്. കുടുംബവുമായി ബന്ധപ്പെട്ട പ്രശ്നങ്ങളും ഭാര്യയെക്കുറിച്ചുള്ള സംശയവും കുറിപ്പിൽ പരാമർശിച്ചിട്ടുണ്ടെന്നാണ് പ്രാഥമിക വിവരം. കുറിപ്പിലെ വിവരങ്ങൾ പൊലീസ് വിശദമായി പരിശോധിച്ചുവരികയാണ്.
ഇന്നലെ വൈകുന്നേരമാണ് ഇമ്രാനും രണ്ട് പെൺമക്കളും ഹോട്ടലിൽ ചെക്ക് ഇൻ ചെയ്തത്. ഇന്ന് വൈകുന്നേരം നാലോടെ മുറി വൃത്തിയാക്കാനെത്തിയ ജീവനക്കാരൻ വാതിലിൽ മുട്ടിയെങ്കിലും പ്രതികരണമുണ്ടായില്ല. തുടർന്ന് ഹോട്ടൽ ജീവനക്കാർ മുറിയിൽ പ്രവേശിച്ചപ്പോഴാണ് കിടക്കയിൽ രണ്ട് കുട്ടികളെയും മരിച്ച നിലയിൽ കണ്ടെത്തിയത്.
തൊട്ടടുത്തുള്ള ടോയ്‌ലറ്റിൽ രക്തത്തിൽ കുളിച്ച നിലയിലാണ് ഇമ്രാനെ കണ്ടെത്തിയത്. ഉടൻ ആശുപത്രിയിൽ പ്രവേശിപ്പിച്ച ഇയാളുടെ നില ഗുരുതരമായി തുടരുകയാണ്. മക്കളെ താനാണ് കൊലപ്പെടുത്തിയതെന്ന് ഇമ്രാൻ പൊലീസിനോട് സമ്മതിച്ചതായാണ് വിവരം. കുട്ടികളെ ശ്വാസംമുട്ടിച്ചാണ് കൊലപ്പെടുത്തിയതെന്നാണ് പ്രാഥമിക അന്വേഷണത്തിലെ കണ്ടെത്തൽ. സംഭവത്തിൽ പൊലീസ് ഹോട്ടലിലെ സിസിടിവി ദൃശ്യങ്ങൾ ഉൾപ്പെടെ പരിശോധിക്കുന്നുണ്ട്.
കുടുംബപ്രശ്നങ്ങളും ഭാര്യയെക്കുറിച്ചുള്ള സംശയവും ഇമ്രാൻ്റെ മാനസികാവസ്ഥയെ സ്വാധീനിച്ചോയെന്നും പൊലീസ് അന്വേഷിക്കുന്നുണ്ട്. കൊലപാതകത്തിന് പിന്നിലെ യഥാർഥ കാരണം കണ്ടെത്താൻ ഇമ്രാൻ ആശുപത്രിയിൽ നിന്ന് സുഖം പ്രാപിച്ച ശേഷം വിശദമായി ചോദ്യം ചെയ്യാനും പൊലീസ് നീക്കം നടത്തുന്നുണ്ട്. സംഭവം ബെംഗളൂരുവിൽ വലിയ ഞെട്ടലാണ് സൃഷ്ടിച്ചിരിക്കുന്നത്. 5-സ്റ്റാർ ഹോട്ടൽ മുറിയിൽ നടന്ന ഇരട്ടക്കൊലയും പിന്നാലെയുള്ള ആത്മഹത്യാശ്രമവും സംബന്ധിച്ച് പൊലീസ് അന്വേഷണം പുരോഗമിക്കുകയാണ്.
