മുഖ്യമന്ത്രി വി.ഡി.സതീശനുമായി നിലവിൽ അഭിപ്രായവ്യത്യാസങ്ങളൊന്നുമില്ലെന്ന് എൻഎസ്എസ് ജനറൽ സെക്രട്ടറി ജി. സുകുമാരൻ നായർ. ഇരുവരും തമ്മിലുണ്ടായിരുന്ന പ്രശ്നങ്ങൾ പരസ്പരം സംസാരിച്ച് പരിഹരിച്ചതായും പഴയ പരാമർശങ്ങൾ മറന്ന് സൗഹൃദത്തിലായതായും അദ്ദേഹം വ്യക്തമാക്കി.
ജനുവരി രണ്ടിന് പെരുന്നയിൽ നടക്കുന്ന മന്നം ജയന്തി ആഘോഷത്തിലേക്ക് മുഖ്യമന്ത്രിയെ ക്ഷണിച്ചതായും സുകുമാരൻ നായർ അറിയിച്ചു. ഫോണിലൂടെയും കത്തിലൂടെയുമാണ് ക്ഷണം നൽകിയത്. പരിപാടിയിൽ പങ്കെടുക്കാമെന്ന് മുഖ്യമന്ത്രി അറിയിച്ചിട്ടുണ്ടെന്നും അദ്ദേഹം മാധ്യമങ്ങളോട് പറഞ്ഞു.
മുഖ്യമന്ത്രി മന്നം സമാധി സന്ദർശിക്കുമോയെന്ന കാര്യത്തിൽ തനിക്ക് അറിവില്ലെന്നും എന്നാൽ അദ്ദേഹം താൽപര്യം പ്രകടിപ്പിച്ചാൽ സന്ദർശനത്തിന് ആവശ്യമായ സൗകര്യങ്ങൾ ഒരുക്കുമെന്നും സുകുമാരൻ നായർ വ്യക്തമാക്കി. നേരത്തെ തനിക്കെതിരെ മുഖ്യമന്ത്രി നടത്തിയ പരാമർശങ്ങളെക്കുറിച്ച് ഇരുവരും സംസാരിച്ചിരുന്നു. അന്നത്തെ സാഹചര്യത്തിലാണ് അത്തരം പരാമർശങ്ങൾ നടത്തിയതെന്ന് മുഖ്യമന്ത്രി വിശദീകരിച്ചതായും സുകുമാരൻ നായർ പറഞ്ഞു. പഴയ കാര്യങ്ങളെല്ലാം മറന്നതായും അദ്ദേഹം കൂട്ടിച്ചേർത്തു.
അതേസമയം, സംവരണ വിഷയത്തിൽ എൻഎസ്എസ് നിലപാട് ആവർത്തിച്ച സുകുമാരൻ നായർ, സാമ്പത്തിക അടിസ്ഥാനത്തിൽ സംവരണം നടപ്പാക്കണമെന്നാണ് സംഘടനയുടെ ആവശ്യമെന്ന് വ്യക്തമാക്കി. പിന്നാക്ക, മുന്നാക്ക വിഭാഗങ്ങളിലെ സാമ്പത്തികമായി പിന്നാക്കം നിൽക്കുന്നവർക്കും സംവരണ ആനുകൂല്യം ലഭിക്കണമെന്നാണ് എൻഎസ്എസിൻ്റെ നിലപാട്. എന്നാൽ ഇക്കാര്യത്തിൽ കേന്ദ്ര-സംസ്ഥാന സർക്കാരുകൾക്ക് സംഘടന ഔദ്യോഗികമായി നിവേദനങ്ങളൊന്നും നൽകിയിട്ടില്ല. മുഖ്യമന്ത്രിയുമായും വിഷയം ചർച്ച ചെയ്തിട്ടില്ലെന്നും ഔദ്യോഗികമായി അറിയിക്കേണ്ട സമയത്ത് സർക്കാരിനെ നിലപാട് അറിയിക്കുമെന്നും അദ്ദേഹം പറഞ്ഞു.
അഞ്ച് വർഷത്തെ ഇടവേളയ്ക്കുശേഷമാണ് വി.ഡി.സതീശൻ എൻഎസ്എസ് ആസ്ഥാനമായ പെരുന്നയിലെത്തുന്നത്. മന്നം ജയന്തി ആഘോഷങ്ങൾ മുഖ്യമന്ത്രി ഉദ്ഘാടനം ചെയ്യുമെന്നാണ് വിവരം. ചടങ്ങിൽ മന്ത്രി കെ. മുരളീധരനും പങ്കെടുക്കും. നിയമസഭാ തിരഞ്ഞെടുപ്പിന് മുമ്പും ശേഷവും സുകുമാരൻ നായർ വി.ഡി. സതീശനെതിരെ രൂക്ഷവിമർശനങ്ങൾ ഉന്നയിച്ചിരുന്നു. ഈ പശ്ചാത്തലത്തിൽ ഇരുവരും തമ്മിലുള്ള മഞ്ഞുരുകൽ രാഷ്ട്രീയ പ്രാധാന്യത്തോടെയാണ് വിലയിരുത്തപ്പെടുന്നത്.
