2023-ലെ കർണാടക നിയമസഭാ തിരഞ്ഞെടുപ്പിൽ കോൺഗ്രസ് നൽകിയ വാഗ്ദാനങ്ങൾ നടപ്പാക്കണമെന്ന് ആവശ്യപ്പെട്ട് വിവിധ മതസമുദായങ്ങളുടെയും കർഷക, ദളിത്, മനുഷ്യാവകാശ, സിവിൽ സൊസൈറ്റി സംഘടനകളുടെയും നേതൃത്വത്തിൽ വ്യാഴാഴ്ച ബെംഗളൂരുവിലെ ഫ്രീഡം പാർക്കിൽ പ്രതിഷേധം സംഘടിപ്പിക്കും.
രാവിലെ 10 മുതൽ ഉച്ചയ്ക്ക് ഒരു മണി വരെ നടക്കുന്ന സമാധാനപരമായ പ്രതിഷേധവും കൺവെൻഷനും ‘വോയ്സ് ഓഫ് മൈനോറിറ്റീസ് ആൻഡ് ദ ഒപ്രസ്ഡ് സെക്ഷൻസ് ഓഫ് കർണാടക’ എന്ന സംഘടനയുടെ നേതൃത്വത്തിലാണ് സംഘടിപ്പിക്കുന്നത്. ക്രൈസ്തവ, മുസ്‌ലിം മതനേതാക്കൾ, കർഷക സംഘടനകൾ, ദളിത് സംഘടനകൾ, മനുഷ്യാവകാശ പ്രവർത്തകർ തുടങ്ങിയവരും പ്രതിഷേധത്തിന് പിന്തുണ പ്രഖ്യാപിച്ചിട്ടുണ്ട്.
ഭരണഘടന ഉറപ്പുനൽകുന്ന സ്വാതന്ത്ര്യങ്ങൾ സംരക്ഷിക്കുക, ന്യൂനപക്ഷങ്ങളുടെ അവകാശങ്ങൾ ഉറപ്പാക്കുക, ജനങ്ങളുടെ ഉപജീവനമാർഗങ്ങൾ സംരക്ഷിക്കുക, സാമൂഹികനീതി നടപ്പാക്കുക തുടങ്ങിയ ആവശ്യങ്ങൾ ഉന്നയിച്ചാണ് പ്രതിഷേധം.
2022-ലെ കർണാടക മതസ്വാതന്ത്ര്യ സംരക്ഷണ നിയമം (മതപരിവർത്തന നിരോധന നിയമം) പിൻവലിക്കണമെന്നാണ് പ്രധാന ആവശ്യം. വിദ്വേഷ പ്രസംഗങ്ങൾക്കും വിദ്വേഷ കുറ്റകൃത്യങ്ങൾക്കുമെതിരെ ഫലപ്രദമായ നടപടികൾ സ്വീകരിക്കണമെന്നും ആവശ്യപ്പെടും.
2020-ലെ കർണാടക കന്നുകാലി കശാപ്പ് നിരോധന-സംരക്ഷണ നിയമം പിൻവലിക്കണമെന്നും പ്രതിഷേധക്കാർ ആവശ്യപ്പെടും. കർഷകർ, കന്നുകാലി വ്യാപാരികൾ, മൃഗങ്ങളെ കടത്തിക്കൊണ്ടുപോകുന്ന തൊഴിലാളികൾ, ഇതുമായി ബന്ധപ്പെട്ട മറ്റു തൊഴിലാളികൾ എന്നിവരുടെ ഉപജീവനമാർഗങ്ങൾ സംരക്ഷിക്കണം. പൗരന്മാർക്ക് ഇഷ്ടമുള്ള ഭക്ഷണം തിരഞ്ഞെടുക്കാനുള്ള അവകാശം ഉറപ്പാക്കുകയും കന്നുകാലി സംരക്ഷണത്തിൻ്റെ പേരിലുള്ള അക്രമങ്ങൾ തടയുകയും വേണമെന്നും സംഘടന ആവശ്യപ്പെടുന്നു.
2023-ലെ നിയമസഭാ തിരഞ്ഞെടുപ്പ് സമയത്ത് കോൺഗ്രസ് നൽകിയ ഉറപ്പുകൾ ഉണ്ടായിട്ടും പ്രധാനപ്പെട്ട പല വാഗ്ദാനങ്ങളും ഇതുവരെ നടപ്പാക്കിയിട്ടില്ലെന്ന് സംഘാടകർ പ്രസ്താവനയിൽ ആരോപിച്ചു.
