ബെംഗളൂരുവിന് അഭിമാനമായി മാറുകയാണ് അമേരിക്കൻ ബഹിരാകാശ ഏജൻസിയായ നാസയുടെ സുപ്രധാന ദൗത്യത്തിന് നേതൃത്വം നൽകാൻ തിരഞ്ഞെടുക്കപ്പെട്ട ഇന്ത്യൻ വംശജയായ ജ്യോതിശാസ്ത്രജ്ഞ ഡോ. രമ്യ മഞ്ജുനാഥ് ആഞ്ചെ. നാസയുടെ 20 മില്യൺ ഡോളർ (ഏകദേശം 180 കോടി രൂപ) സാമ്പത്തിക സഹായത്തോടെ നടപ്പാക്കുന്ന PUFFINS എന്ന ബഹിരാകാശ ദൗത്യത്തിൻ്റെ പ്രിൻസിപ്പൽ ഇൻവെസ്റ്റിഗേറ്ററായാണ് രമ്യ തിരഞ്ഞെടുക്കപ്പെട്ടത്.
ബെംഗളൂരുവിനടുത്ത് ദേവനഹള്ളിയിൽ വളർന്ന രമ്യ, അമേരിക്കയിലെ അരിസോണ സർവകലാശാലയിലെ സ്റ്റീവാർഡ് ഒബ്സർവേറ്ററിയിൽ അസിസ്റ്റന്റ് റിസർച്ച് പ്രൊഫസറാണ്. അന്താരാഷ്ട്ര തലത്തിൽ ശ്രദ്ധേയമായ ഈ നേട്ടത്തിന് പിന്നിൽ വർഷങ്ങളായുള്ള ഗവേഷണവും കഠിനാധ്വാനവുമുണ്ട്.
Polarimetry in the Ultraviolet to Find Features in INterStellar dust എന്നതിൻ്റെ ചുരുക്കപ്പേരാണ് PUFFINS. നക്ഷത്രങ്ങൾക്കിടയിൽ വ്യാപിച്ചുകിടക്കുന്ന അതിസൂക്ഷ്മമായ പൊടിപടലങ്ങളെക്കുറിച്ച് പഠിക്കുകയാണ് ദൗത്യത്തിൻ്റെ പ്രധാന ലക്ഷ്യം.
ഇതിനായി ഏകദേശം 10 ഇഞ്ച് വ്യാസമുള്ള, വലിയൊരു ഡിന്നർ പ്ലേറ്റിൻ്റെ വലുപ്പത്തിലുള്ള പ്രത്യേക അൾട്രാവയലറ്റ് ടെലിസ്കോപ്പ് ഘടിപ്പിച്ച ചെറു ഉപഗ്രഹമാണ് വികസിപ്പിക്കുന്നത്. ഏകദേശം 70 നക്ഷത്രങ്ങളിൽനിന്നുള്ള അൾട്രാവയലറ്റ് പ്രകാശം നിരീക്ഷിച്ച് അവയ്ക്കിടയിലെ പൊടിപടലങ്ങളുടെ ഘടനയും സ്വഭാവവും പഠിക്കും.
സാധാരണ ടെലിസ്കോപ്പുകൾക്ക് കണ്ടെത്താൻ പ്രയാസമുള്ള, ഏകദേശം 50 നാനോമീറ്ററിൽ താഴെ വലുപ്പമുള്ള പൊടിപടലങ്ങളാണ് പഠനവിധേയമാക്കുന്നത്. ഒരു സാധാരണ ജലദോഷ വൈറസിൻ്റെ വലുപ്പത്തോട് സാമ്യമുള്ളവയാണ് ഈ കണങ്ങൾ. ബഹിരാകാശത്തെ പൊടിപടലങ്ങൾ നിസ്സാരമെന്ന് തോന്നാമെങ്കിലും നക്ഷത്രപ്രകാശം ഗാലക്സിയിലൂടെ സഞ്ചരിക്കുന്ന രീതിയെയും പുതിയ നക്ഷത്രങ്ങളുടെയും ഗ്രഹങ്ങളുടെയും രൂപീകരണത്തെയും ഇവ സ്വാധീനിക്കുന്നുണ്ട്.
അൾട്രാവയലറ്റ് സ്പെക്ട്രോപോളാരിമെട്രി എന്ന നൂതന സാങ്കേതികവിദ്യ ഉപയോഗിച്ചാണ് പഠനം നടത്തുന്നത്. ഏകദേശം മൂന്ന് പതിറ്റാണ്ടായി ബഹിരാകാശത്തുനിന്ന് ഈ രീതിയിലുള്ള നിരീക്ഷണം നടന്നിട്ടില്ല. അതിനാൽ ദൗത്യത്തിലൂടെ ലഭിക്കുന്ന വിവരങ്ങൾ ജ്യോതിശാസ്ത്ര ഗവേഷണത്തിൽ നിർണായകമാകുമെന്നാണ് പ്രതീക്ഷ.
ബെംഗളൂരുവിലെ ഓക്സ്ഫഡ് ഇംഗ്ലീഷ് സ്കൂളിലും എംഇഎസ് വിദ്യാസാഗർ പ്രൊഫ. എം.പി.എൽ. ശാസ്ത്രി പ്രീ-യൂണിവേഴ്സിറ്റി കോളേജിലുമായിരുന്നു രമ്യയുടെ പഠനം. തുടർന്ന് സിർ എം. വിശ്വേശ്വരയ്യ ഇൻസ്റ്റിറ്റ്യൂട്ട് ഓഫ് ടെക്നോളജിയിൽനിന്ന് ഇലക്ട്രിക്കൽ ആൻഡ് ഇലക്ട്രോണിക്സ് എൻജിനീയറിങ്ങിൽ ബിരുദം നേടി.
2012-ൽ ഇന്ത്യൻ ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സിൽ ചേർന്ന രമ്യ ജ്യോതിശാസ്ത്ര ഉപകരണ നിർമാണത്തിൽ ഇന്റഗ്രേറ്റഡ് എംടെക്-പിഎച്ച്ഡി ഗവേഷണം നടത്തി. പിന്നീട് പൂനെയിലെ IUCAAയിൽ പോസ്റ്റ് ഡോക്ടറൽ ഗവേഷണവും പൂർത്തിയാക്കി. 2021-ലാണ് അമേരിക്കയിലെ അരിസോണ സർവകലാശാലയിലെത്തിയത്.
2003-ൽ കൊളംബിയ ബഹിരാകാശ വാഹന ദുരന്തത്തിൽ ഏഴ് ബഹിരാകാശ സഞ്ചാരികൾ മരിച്ച സംഭവം കൗമാരക്കാരിയായിരുന്ന രമ്യയെ ആഴത്തിൽ സ്വാധീനിച്ചിരുന്നു. ബഹിരാകാശ ഗവേഷണത്തിലേക്ക് കൂടുതൽ ശ്രദ്ധ തിരിക്കാൻ ആ സംഭവം കാരണമായതായി അവർ വെളിപ്പെടുത്തിയിട്ടുണ്ട്.
ശാസ്ത്രജ്ഞർ, എൻജിനീയർമാർ, ഗവേഷക വിദ്യാർഥികൾ എന്നിവരടക്കം ഏകദേശം 40 പേരാണ് PUFFINS ദൗത്യത്തിൻ്റെ ഭാഗമാകുന്നത്. അമേരിക്കയിലെ അരിസോണ സർവകലാശാലയ്ക്കൊപ്പം ടെക്സസിലെ മക്‌ഡൊണാൾഡ് ഒബ്സർവേറ്ററിയും വിവിധ രാജ്യങ്ങളിൽനിന്നുള്ള ഗവേഷകരും പദ്ധതിയിൽ പങ്കാളികളാണ്. ഇന്ത്യയിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ആസ്ട്രോഫിസിക്സും പൂനെയിലെ IUCAAയും പദ്ധതിയുമായി ബന്ധപ്പെട്ട ഗവേഷണ ശൃംഖലയുടെ ഭാഗമാണ്.
നിലവിൽ പ്രാരംഭ രൂപകൽപ്പനാ ഘട്ടത്തിലുള്ള ദൗത്യത്തിൻ്റെ ടെലിസ്കോപ്പ് നിർമാണത്തിന് അടുത്ത നാലുവർഷം ചെലവഴിക്കാനാണ് പദ്ധതി. 2030-ഓടെ വിക്ഷേപിക്കുകയാണ് അരിസോണ സർവകലാശാല പ്രഖ്യാപിച്ചിരിക്കുന്ന ലക്ഷ്യം.
ബഹിരാകാശ ഗവേഷണരംഗത്ത് ഇന്ത്യയുടെ ശാസ്ത്രപ്രതിഭയുടെ സാന്നിധ്യം വീണ്ടും അടയാളപ്പെടുത്തുന്നതാണ് ദേവനഹള്ളിയിൽനിന്ന് നാസയുടെ സുപ്രധാന ദൗത്യത്തിൻ്റെ നേതൃത്വത്തിലെത്തിയ രമ്യയുടെ നേട്ടം.
