മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ട് ഡൽഹിയിൽ പ്രതിഷേധം ശക്തമായി. ജന്തർ മന്തറിലും തിരഞ്ഞെടുപ്പ് കമ്മിഷൻ ആസ്ഥാനത്തിന് സമീപവും വിവിധ രാഷ്ട്രീയ പാർട്ടികളുടെയും യുവജന സംഘടനകളുടെയും നേതൃത്വത്തിൽ പ്രതിഷേധങ്ങൾ നടന്നു. ഗ്യാനേഷ് കുമാറിൻ്റെ രാജി ആവശ്യപ്പെട്ടുള്ള പ്രതിഷേധങ്ങൾ രാജ്യത്തിൻ്റെ വിവിധ ഭാഗങ്ങളിലേക്കും വ്യാപിച്ചതായി റിപ്പോർട്ടുകളുണ്ട്.
ജന്തർ മന്തറിലേക്കുള്ള പ്രതിഷേധ റാലി പൊലീസ് ബാരിക്കേഡ് ഉപയോഗിച്ച് തടഞ്ഞതായും പ്രതിഷേധക്കാരെ കസ്റ്റഡിയിലെടുത്തതായും റിപ്പോർട്ടുണ്ട്. പ്രദേശത്ത് സുരക്ഷ ശക്തമാക്കിയിട്ടുണ്ട്. തിരഞ്ഞെടുപ്പ് കമ്മിഷൻ ആസ്ഥാനത്തിന് സമീപവും വൻ പൊലീസ് സന്നാഹം ഏർപ്പെടുത്തി.
തിരഞ്ഞെടുപ്പ് കമ്മിഷനിലെ രണ്ട് അംഗങ്ങളായ സുഖ്ബീർ സിങ് സന്ധുവും വിവേക് ജോഷിയും കഴിഞ്ഞ പത്ത് മാസത്തിനിടെ കമ്മിഷൻ്റെ ചില നടപടികളിൽ കുറഞ്ഞത് 14 തവണ ഔദ്യോഗികമായി എതിർപ്പ് രേഖപ്പെടുത്തിയെന്ന ഇന്ത്യൻ എക്സ്പ്രസ് റിപ്പോർട്ടാണ് പുതിയ വിവാദത്തിന് തുടക്കമിട്ടത്. പുതിയ വോട്ടർമാരുടെ രജിസ്ട്രേഷൻ, വോട്ടർപട്ടികയിൽനിന്നുള്ള പേരുകൾ നീക്കം ചെയ്യൽ, വോട്ടർ ഡാറ്റയുടെ നിയന്ത്രണം, എസ്‌ഐആർ നടപടിക്രമങ്ങൾ തുടങ്ങിയ വിഷയങ്ങളിലാണ് എതിർപ്പുകൾ രേഖപ്പെടുത്തിയതെന്നാണ് റിപ്പോർട്ട്.
അതേസമയം, തിരഞ്ഞെടുപ്പ് കമ്മിഷനിലെ തീരുമാനങ്ങൾ ഭൂരിപക്ഷാഭിപ്രായത്തിൻ്റെ അടിസ്ഥാനത്തിലാണ് എടുക്കുന്നതെന്നും കമ്മിഷൻ അംഗങ്ങൾ തമ്മിലുള്ള വ്യത്യസ്ത അഭിപ്രായങ്ങൾ തീരുമാനമെടുക്കൽ പ്രക്രിയയുടെ ഭാഗമാണെന്നും റിപ്പോർട്ടുകൾ വ്യക്തമാക്കുന്നു. എസ്‌ഐആർ ഉൾപ്പെടെയുള്ള നടപടികളിൽ കമ്മിഷൻ ഏകകണ്ഠമായാണ് തീരുമാനമെടുത്തതെന്ന നിലപാടും കമ്മിഷൻ വൃത്തങ്ങൾ വ്യക്തമാക്കിയിട്ടുണ്ട്.
എസ്‌ഐആറിൻ്റെ ഭാഗമായി 30 സംസ്ഥാനങ്ങളിലും കേന്ദ്രഭരണപ്രദേശങ്ങളിലുമായി 13 കോടിയിലേറെ പേരുകൾ കരട് വോട്ടർപട്ടികയിൽനിന്ന് ഒഴിവാക്കിയതായി ഇന്ത്യൻ എക്സ്പ്രസ് റിപ്പോർട്ട് ചെയ്തിട്ടുണ്ട്. എന്നാൽ ഒഴിവാക്കപ്പെട്ടവരിൽ മരിച്ചവർ, താമസം മാറിയവർ, ഇരട്ടപ്പേരുകൾ തുടങ്ങിയ വിവിധ വിഭാഗങ്ങൾ ഉൾപ്പെട്ടിട്ടുണ്ടെന്നാണ് തിരഞ്ഞെടുപ്പ് കമ്മിഷൻ്റെ വിശദീകരണം.
