കാബുകൾക്കും ഓട്ടോറിക്ഷകൾക്കും ഡിജിറ്റൽ ഫെയർ മീറ്റർ നിർബന്ധമാക്കാനുള്ള കർണാടക ഗതാഗത വകുപ്പിൻ്റെ തീരുമാനത്തിനെതിരെ സ്വകാര്യ ഗതാഗത ഓപ്പറേറ്റർമാർ പ്രതിഷേധത്തിനൊരുങ്ങുന്നു. സർക്കാർ നിശ്ചയിച്ച നിരക്കുകൾ ഊബർ, ഓല, മറ്റ് ആപ്പ് അധിഷ്ഠിത അഗ്രിഗേറ്റർമാരും കർശനമായി പാലിക്കുന്നുവെന്ന് ഉറപ്പാക്കിയ ശേഷമേ ഡിജിറ്റൽ മീറ്റർ നിർബന്ധമാക്കാവൂ എന്നാണ് സംഘടനകളുടെ ആവശ്യം.
ഫെഡറേഷൻ ഓഫ് കർണാടക സ്റ്റേറ്റ് പ്രൈവറ്റ് ട്രാൻസ്പോർട്ട് അസോസിയേഷൻ ഗതാഗത വകുപ്പിന് ആറ് മുതൽ ഏഴ് ദിവസം വരെ സമയപരിധി നൽകിയിട്ടുണ്ട്. ആവശ്യങ്ങൾ അംഗീകരിച്ചില്ലെങ്കിൽ ബെംഗളൂരുവിലും സംസ്ഥാനത്തുടനീളവും കാബ്, ഓട്ടോ സർവീസുകൾ നിർത്തിവെച്ച് വലിയ പ്രതിഷേധം നടത്തുമെന്ന് സംഘടന മുന്നറിയിപ്പ് നൽകി. കഴിഞ്ഞ ദിവസങ്ങളിലായി ഡ്രൈവർമാർ വാഹനങ്ങളിൽ കറുത്ത കൊടി കെട്ടിയാണ് പ്രതിഷേധിക്കുന്നത്.
ഡിജിറ്റൽ മീറ്റർ സംവിധാനത്തെ സംഘടന പൂർണമായി എതിർക്കുന്നില്ല. എന്നാൽ അഗ്രിഗേറ്റർ കമ്പനികൾ സർജ് പ്രൈസിങ് അഥവാ ഡിമാൻഡ് അടിസ്ഥാനത്തിലുള്ള നിരക്ക് ഈടാക്കുന്നത് അവസാനിപ്പിക്കണം എന്നാണ് പ്രധാന ആവശ്യം. സർക്കാർ നിശ്ചയിച്ച നിരക്ക് പ്രകാരം യാത്രക്കാരിൽ നിന്ന് ഈടാക്കുന്ന തുകയിൽ ഡ്രൈവർമാർക്ക് അർഹമായ വിഹിതം ലഭിക്കണമെന്നും സംഘടന ആവശ്യപ്പെടുന്നു.
അതേസമയം, കർണാടക ഗതാഗത വകുപ്പ് സെപ്റ്റംബർ ഏഴിന് പുറപ്പെടുവിച്ച നിർദേശപ്രകാരം സംസ്ഥാനത്തെ ടാക്സികൾക്കും മോട്ടോർ കാബുകൾക്കും ഡിജിറ്റൽ ഫെയർ മീറ്റർ നിർബന്ധമാണ്. ഊബർ, ഓല, റാപ്പിഡോ തുടങ്ങിയ അഗ്രിഗേറ്റർ പ്ലാറ്റ്ഫോമുകളുമായി ബന്ധമുള്ള കാബുകൾക്കും ഇത് ബാധകമാണ്. മീറ്റർ ഘടിപ്പിക്കാത്ത വാഹനങ്ങളുടെ ഫിറ്റ്നസ് സർട്ടിഫിക്കറ്റ് പുതുക്കില്ലെന്നും വകുപ്പ് വ്യക്തമാക്കിയിട്ടുണ്ട്.
സർക്കാർ നിശ്ചയിച്ച നിരക്കിൽ 10 ലക്ഷം രൂപ വരെ വിലയുള്ള കാറുകൾക്ക് ആദ്യ 4 കിലോമീറ്ററിന് ₹100, തുടർന്ന് കിലോമീറ്ററിന് ₹24 എന്നതാണ് നിരക്ക്. 10–15 ലക്ഷം രൂപ വിലയുള്ള വാഹനങ്ങൾക്ക് ആദ്യ 4 കിലോമീറ്ററിന് ₹115, തുടർന്ന് ₹28 വീതവും 15 ലക്ഷത്തിന് മുകളിലുള്ള വാഹനങ്ങൾക്ക് ആദ്യ 4 കിലോമീറ്ററിന് ₹130, തുടർന്ന് കിലോമീറ്ററിന് ₹32 വീതവുമാണ് നിരക്ക്.
ഇതിനിടെ, കാബുകളുടെ വിവിധ പെർമിറ്റ് വിഭാഗങ്ങൾക്കും പ്രവർത്തന രീതികൾക്കും ഒരേ നിയമം ബാധകമാക്കുന്നതിൽ വ്യക്തതയില്ലെന്ന് കർണാടക സ്റ്റേറ്റ് ട്രാവൽ ഓപ്പറേറ്റേഴ്സ് അസോസിയേഷനും (KSTOA) ചൂണ്ടിക്കാട്ടിയിട്ടുണ്ട്. സർക്കാർ ഉത്തരവ് താൽക്കാലികമായി മരവിപ്പിച്ച് വിവിധ വിഭാഗങ്ങളുമായി ചർച്ച നടത്തണമെന്നാണ് അവരുടെ ആവശ്യം. പ്രതിഷേധം ശക്തമായാൽ ബെംഗളൂരുവിലെ ഓട്ടോ-കാബ് സർവീസുകളെ ബാധിക്കാനും യാത്രക്കാരുടെ ദൈനംദിന യാത്രകൾക്ക് തിരിച്ചടിയാകാനും സാധ്യതയുണ്ട്.
