ഇന്ത്യ ആതിഥേയത്വം വഹിച്ച 18-ാമത് ബ്രിക്സ് ഉച്ചകോടിക്കിടെ പ്രധാനമന്ത്രി നരേന്ദ്രമോദി വിവിധ ലോകനേതാക്കളുമായി 15 ഉഭയകക്ഷി ചർച്ചകൾ നടത്തി. മൂന്ന് ദിവസങ്ങളിലായി നടന്ന കൂടിക്കാഴ്ചകളിൽ ഇന്ത്യയുടെ നയതന്ത്ര, സാമ്പത്തിക താൽപര്യങ്ങൾക്ക് പ്രധാന പരിഗണന നൽകി.
റഷ്യൻ പ്രസിഡണ്ട് വ്ലാദിമിർ പുടിനുമായുള്ള കൂടിക്കാഴ്ചയിൽ പ്രതിരോധം, ഊർജം, സിവിൽ ന്യൂക്ലിയർ മേഖലകളിലെ സഹകരണവും 2030ഓടെ ഉഭയകക്ഷി വ്യാപാരം 100 ബില്യൺ ഡോളറിലെത്തിക്കാനുള്ള പദ്ധതികളും ചർച്ചയായി. റഷ്യ-യുക്രെയ്ൻ, പശ്ചിമേഷ്യൻ സംഘർഷങ്ങൾക്ക് നയതന്ത്രപരമായ പരിഹാരമാണ് വേണ്ടതെന്ന് മോദി വ്യക്തമാക്കി.
ചൈനീസ് പ്രസിഡണ്ട് ഷീ ജിൻപിങ്ങുമായുള്ള കൂടിക്കാഴ്ചയിൽ അതിർത്തി പ്രശ്നങ്ങൾ, സമാധാനം, വിതരണ ശൃംഖലയുടെ സുരക്ഷ എന്നിവ പ്രധാന വിഷയങ്ങളായി. അഭിപ്രായവ്യത്യാസങ്ങൾ തർക്കങ്ങളായി മാറരുതെന്നും പരസ്പര ബഹുമാനം അനിവാര്യമാണെന്നും മോദി ചൂണ്ടിക്കാട്ടി.
ഇറാൻ പ്രസിഡണ്ട് മസൂദ് പെസഷ്കിയാനുമായി നടത്തിയ ചർച്ചയിൽ പശ്ചിമേഷ്യയിലെ സമാധാനവും സുരക്ഷയും പ്രധാന വിഷയമായി. യുഎൻ സെക്രട്ടറി ജനറൽ അന്റോണിയോ ഗുട്ടെറസുമായും മോദി കൂടിക്കാഴ്ച നടത്തി.
മലേഷ്യൻ പ്രധാനമന്ത്രി അൻവർ ഇബ്രാഹിം, യുഎഇ കിരീടാവകാശി ഷെയ്ഖ് ഖാലിദ്, എത്യോപ്യൻ പ്രധാനമന്ത്രി എന്നിവരുമായും പ്രധാനമന്ത്രി കൂടിക്കാഴ്ച നടത്തി. ദക്ഷിണാഫ്രിക്കൻ പ്രസിഡണ്ട് സിറിൽ റമഫോസ, കസാഖിസ്ഥാൻ പ്രസിഡണ്ട് കാസിം ജോമാർട്ട് ടോകയേവ്, ഫിലിപ്പീൻസ് പ്രസിഡണ്ട് ഫെർഡിനാൻഡ് മാർക്കോസ് ജൂനിയർ, ഈജിപ്ത് പ്രസിഡണ്ട് അബ്ദുൽ ഫത്താഹ് അൽ സിസി എന്നിവരുമായി നടത്തിയ ചർച്ചകളിലൂടെ ഗ്ലോബൽ സൗത്ത് സഹകരണം ശക്തിപ്പെടുത്തുന്നതിനും ഊന്നൽ നൽകി.
ഔദ്യോഗിക കൂടിക്കാഴ്ചകൾക്ക് പുറമെ നിരവധി അനൗദ്യോഗിക ചർച്ചകളും നയതന്ത്ര കൂടിക്കാഴ്ചകളും ഉച്ചകോടിയുടെ ഭാഗമായി നടന്നു.
