ഓണാവധിയിലെ തിരക്ക് കണക്കിലെടുത്ത് ബെംഗളൂരുവിൽ നിന്ന് മലബാർ മേഖലയിലേക്ക് ഇന്ന് വൈകിട്ട് 4.40ന് സർവീസ് നടത്തുന്ന ദക്ഷിണ പശ്ചിമ റെയിൽവേയുടെ സ്പെഷ്യൽ ട്രെയിനിൽ 500ലേറെ സീറ്റുകൾ ഇപ്പോഴും ലഭ്യമാണ്. അതേസമയം, സ്ഥിരം ട്രെയിനുകളിലെ നൂറുകണക്കിന് ടിക്കറ്റുകൾ വെയിറ്റിങ് ലിസ്റ്റിലാണ്. നാട്ടിലേക്ക് മടങ്ങാൻ ടിക്കറ്റ് ലഭിക്കാത്തതിനാൽ നിരവധി യാത്രക്കാർ യാത്ര ഒഴിവാക്കേണ്ട സാഹചര്യമുണ്ടായപ്പോഴാണ് അധിക സർവീസിൽ സീറ്റുകൾ ലഭ്യമായിരിക്കുന്നത്.
ഓണദിവസങ്ങളിലേക്കുള്ള കേരള റൂട്ടിലെ പല ട്രെയിനുകളിലെയും ടിക്കറ്റുകൾ ജൂലൈയിൽ തന്നെ തീർന്നിരുന്നു. എന്നാൽ സ്പെഷ്യൽ ട്രെയിനുകളുടെ പ്രഖ്യാപനം വൈകിയത് യാത്രക്കാർക്ക് ബുദ്ധിമുട്ടുണ്ടാക്കിയെന്ന പരാതിയും ഉയർന്നിരുന്നു. മുൻ വർഷങ്ങളിലും സമാനമായ രീതിയിൽ അവസാനഘട്ടത്തിലാണ് അധിക സർവീസുകൾ പ്രഖ്യാപിച്ചതെന്ന വിമർശനവും നിലനിന്നിരുന്നു.
വടക്കൻ കേരളത്തിലേക്ക് യാത്ര ചെയ്യാൻ സ്ഥിരം ട്രെയിനുകളിൽ ടിക്കറ്റ് ലഭിക്കാത്തവർക്ക് സ്പെഷ്യൽ സർവീസ് പ്രയോജനപ്പെടുത്താം. നിലവിൽ 400ലേറെ സീറ്റുകൾ ഒഴിവുള്ളതിനാൽ അവസാന നിമിഷം യാത്ര തീരുമാനിക്കുന്നവർക്കും ടിക്കറ്റ് ലഭിക്കാനുള്ള സാധ്യതയുണ്ട്. സ്ഥിരം ട്രെയിനുകളിൽ വെയിറ്റിങ് ലിസ്റ്റ് ഉയർന്ന സാഹചര്യത്തിൽ, ഇന്ന് വൈകിട്ട് ബെംഗളൂരുവിൽ നിന്ന് പുറപ്പെടുന്ന ഈ പ്രത്യേക സർവീസ് ഓണത്തിന് മലബാറിലേക്ക് മടങ്ങുന്ന യാത്രക്കാർക്ക് ഏറെ പ്രയോജനപ്പെടുമെന്നാണ് പ്രതീക്ഷ.
യാത്രക്കാരുടെ തിരക്ക് കുറയ്ക്കുന്നതിനായാണ് ട്രെയിൻ നമ്പർ 06581 സർ എം. വിശ്വേശ്വരയ്യ ടെർമിനൽ ബെംഗളൂരു–മംഗളൂരു ജംഗ്ഷൻ വൺവേ സ്പെഷ്യൽ എക്സ്പ്രസ് അനുവദിച്ചിരിക്കുന്നത്. ഓഗസ്റ്റ് 23ന് (ഇന്ന്) വൈകിട്ട് 4.40ന് ബെംഗളൂരുവിലെ സർ എം. വിശ്വേശ്വരയ്യ ടെർമിനലിൽ നിന്ന് ട്രെയിൻ പുറപ്പെടും. ഓഗസ്റ്റ് 24ന് രാവിലെ 9.30ന് മംഗളൂരു ജംഗ്ഷനിൽ എത്തിച്ചേരും.
ബെംഗളൂരുവിൽ നിന്ന് കൃഷ്ണരാജപുരം, ബംഗാർപേട്ട്, കുപ്പം, സേലം, ഈറോഡ്, തിരുപ്പൂർ, പോഡനൂർ ജംഗ്ഷൻ, പാലക്കാട്, ഷൊർണൂർ, തിരൂർ, കോഴിക്കോട്, വടകര, തലശ്ശേരി, കണ്ണൂർ, പയ്യന്നൂർ, കാഞ്ഞങ്ങാട്, കാസർകോട് എന്നിവിടങ്ങളിലൂടെയാണ് ട്രെയിൻ മംഗളൂരുവിലെത്തുന്നത്.
