തമിഴ്നാടിന് 15 ദിവസത്തേക്ക് പ്രതിദിനം 12,000 ക്യുസെക്സ് കാവേരി ജലം വിട്ടുനൽകണമെന്ന കാവേരി വാട്ടർ മാനേജ്മെന്റ് അതോറിറ്റിയുടെ (CWMA) നിർദേശത്തിനെതിരെ വ്യാഴാഴ്ച ആഹ്വാനം ചെയ്ത കർണാടക ബന്ദിനെച്ചൊല്ലി കന്നഡ സംഘടനകൾക്കിടയിൽ ഭിന്നത രൂക്ഷമായി.
ഫെഡറേഷൻ ഓഫ് കന്നഡ ഓർഗനൈസേഷൻസ് പ്രസിഡണ്ട്വാട്ടാൾ നാഗരാജ് ബന്ദുമായി മുന്നോട്ടുപോകുമ്പോൾ, ഫെഡറേഷനിലെ നിരവധി സംഘടനകൾ പൂർണ ബന്ദിൽ പങ്കെടുക്കേണ്ടതില്ലെന്ന നിലപാടിലാണ്. എന്നാൽ നാഗരാജിൻ്റെ പ്രതിഷേധത്തിന് ധാർമിക പിന്തുണ നൽകുമെന്ന് ഇവർ അറിയിച്ചു.
അതേസമയം റൈത ഹിതരക്ഷണ സമിതി ഉൾപ്പെടെയുള്ള ചില കർഷക സംഘടനകൾ ബന്ദിന് പിന്തുണ പ്രഖ്യാപിച്ചിട്ടുണ്ട്. “കർണാടകയോട് അനീതി കാണിച്ച സാഹചര്യത്തിലാണ് ബന്ദിനെ പിന്തുണയ്ക്കുന്നത്,” റൈത ഹിതരക്ഷണ സമിതി നേതാവ് സുനന്ദ പറഞ്ഞു.
ഗതാഗതം സാധാരണ നിലയിൽ?
BMTC, KSRTC ജീവനക്കാരുടെ സംഘടനകൾ ബന്ദിന് പിന്തുണ പ്രഖ്യാപിച്ചിട്ടില്ല. സ്വകാര്യ ബസ് സംഘടനകൾ, ചരക്ക് ഗതാഗത മേഖലയിലെ സംഘടനകൾ, ഓട്ടോറിക്ഷാ സംഘടനകൾ എന്നിവയും ബന്ദിൽ നിന്ന് വിട്ടുനിൽക്കുകയാണ്. അതിനാൽ ബെംഗളൂരുവിലടക്കം പൊതുഗതാഗതത്തെ ബന്ദ് കാര്യമായി ബാധിക്കാനുള്ള സാധ്യത കുറവാണ്.
തെരുവുകച്ചവടക്കാരും പതിവുപോലെ വ്യാപാരം നടത്തുമെന്നാണ് സൂചന. സർക്കാർ, സ്വകാര്യ സ്കൂളുകളും സാധാരണ നിലയിൽ പ്രവർത്തിക്കും.
കാവേരി ജലം വിട്ടുതുടങ്ങി
തമിഴ്നാടിന് 15 ദിവസത്തേക്ക് പ്രതിദിനം 12,000 ക്യുസെക്സ് കാവേരി ജലം വിട്ടുനൽകണമെന്ന CWMA നിർദേശത്തിനെതിരെയാണ് വാട്ടാൾ നാഗരാജിൻ്റെയും പിന്തുണയ്ക്കുന്ന സംഘടനകളുടെയും പ്രതിഷേധം. ബുധനാഴ്ച രാവിലെ മുതൽ കർണാടക ജലം വിട്ടുതുടങ്ങി.
കർണാടകയിലെ നിലവിലെ സാഹചര്യത്തിൽ ഇത്രയും വലിയ അളവിൽ വെള്ളം വിട്ടുനൽകാൻ കഴിയില്ലെന്നാണ് സംസ്ഥാന സർക്കാരിൻ്റെ നിലപാട്. കാവേരി നദീതടത്തിൽ ഉൾപ്പെടെ മഴയുടെ കുറവും ജലലഭ്യതയിലെ പ്രതിസന്ധിയുമാണ് സർക്കാർ ചൂണ്ടിക്കാട്ടുന്നത്.
കന്നഡ സംഘടനകൾക്കിടയിലെ ഭിന്നതയും പ്രധാന ഗതാഗത സംഘടനകൾ ബന്ദിൽ നിന്ന് വിട്ടുനിൽക്കുന്നതും വ്യാഴാഴ്ചത്തെ ബന്ദിന്റെ വ്യാപ്തി കുറയ്ക്കാൻ സാധ്യതയുണ്ട്.
