നിർമിതബുദ്ധി (AI) രംഗത്ത് പ്രാവീണ്യമുള്ള മനുഷ്യവിഭവശേഷി വളർത്തുന്നതിനായി പ്രത്യേക എഐ സർവകലാശാല സ്ഥാപിക്കുന്നത് കർണാടക സർക്കാരിൻ്റെ സജീവ പരിഗണനയിലാണെന്ന് മുഖ്യമന്ത്രി ഡി.കെ. ശിവകുമാർ വ്യക്തമാക്കി. എഐ, മെഷീൻ ലേണിംഗ്, ഡാറ്റ സയൻസ്, റോബോട്ടിക്സ് തുടങ്ങിയ അത്യാധുനിക മേഖലകളിൽ ലോകോത്തര വിദ്യാഭ്യാസവും ഗവേഷണവും ലക്ഷ്യമിട്ടാണ് പദ്ധതി ആലോചിക്കുന്നത്.
ഐടി, ബിടി, ഇലക്ട്രോണിക്സ് വകുപ്പ് സംഘടിപ്പിച്ച ‘കാറ്റലിസ്റ്റ് കണക്ട്’ സമ്മേളനത്തിലാണ് മുഖ്യമന്ത്രി ഇക്കാര്യം അറിയിച്ചത്. സംസ്ഥാനത്ത് ഗ്ലോബൽ കേപ്പബിലിറ്റി സെന്ററുകളുടെ (GCC) വളർച്ച വേഗത്തിലാക്കുകയും വ്യവസായ-വിദ്യാഭ്യാസ മേഖലകളെ കൂടുതൽ ബന്ധിപ്പിക്കുകയും ചെയ്യുക എന്നതാണ് സമ്മേളനത്തിൻ്റെ പ്രധാന ലക്ഷ്യം.
എഐ സർവകലാശാലയുടെ രൂപരേഖ അന്തിമമാക്കുന്നതിന് മുൻപ് ഐടി കമ്പനികൾ, വിദ്യാഭ്യാസ വിദഗ്ധർ, വ്യവസായ സംഘടനകൾ എന്നിവരുടെ അഭിപ്രായങ്ങൾ സർക്കാർ തേടുകയാണെന്നും ഡി.കെ. ശിവകുമാർ പറഞ്ഞു. ഭാവിയിൽ എഐ മേഖലയിലെ ആഗോള കേന്ദ്രമായി കർണാടകയെ ഉയർത്തുകയാണ് സർക്കാരിന്റെ ലക്ഷ്യമെന്നും അദ്ദേഹം കൂട്ടിച്ചേർത്തു.
