ബംഗളൂരുവിൽ കെ.ആർ മാർക്കറ്റിന് സമീപമുള്ള പ്ലാസ്റ്റിക് പായ നിർമ്മാണ യൂണിറ്റിൽ തീപിടിത്തത്തിൽ ഒരു കുടുംബത്തിലെ നാലംഗങ്ങൾ ഉൾപ്പെടെ അഞ്ച് പേർ കൊല്ലപ്പെട്ട സംഭവത്തിൽ കെട്ടിട ഉടമയെയും മകനെയും അറസ്റ്റ് ചെയ്തു. സുരക്ഷ നടപടികളുടെ അഭാവം, അനധികൃത നിർമ്മാണം, അഗ്നി സുരക്ഷാ മുൻകരുതലുകൾ പാലിക്കാത്തത് എന്നീ കുറ്റങ്ങൾ ചുമത്തി കെട്ടിട ഉടമ ബാലകൃഷ്ണയ്യ ഷെട്ടിയെയും മകൻ സന്ദീപ് ഷെട്ടിയെയുമാണ് അറസ്റ്റ് ചെയ്തത്.
താഴത്തെ നിലയിലെ ഗോഡൗണിൽ ശനിയാഴ്ച പുലർച്ച മൂന്നോടെ ഉണ്ടായ തീപിടിത്തം മുകളിലത്തെ നിലകളിലേക്ക് പടർന്നായിരുന്നു ദുരന്തം. മിക്ക താമസക്കാരും രക്ഷപ്പെട്ടെങ്കിലും മദൻ സിങ് (38), ഭാര്യ സംഗീത (33), അവരുടെ മക്കളായ മിതേഷ് (7), വിഹാൻ (5), അയൽക്കാരൻ സുരേഷ് കുമാർ (26) എന്നിവർ കൊല്ലപ്പെടുകയായിരുന്നു.
10 വർഷമായി രാജസ്ഥാൻ സ്വദേശിയായ മദൻ സിങ് കെട്ടിടം വാടകക്ക് എടുക്കുകയായിരുന്നു. മാറ്റുകളും, പ്ലാസ്റ്റിക് അടുക്കള വസ്തുക്കളും, സ്റ്റീൽ അടുക്കള ഉപകരണങ്ങളും നിർമ്മിക്കുന്ന ഒരു ചെറിയ നിർമ്മാണ യൂണിറ്റ് അയാൾ നടത്തിയിരുന്നു. കെട്ടിടത്തി ന്‍റെ മുകളിലത്തെ നിലയിലായിരുന്നു അയാൾ താമസിച്ചിരുന്നത്
