പ്രതികൾക്കൊപ്പം പാർട്ടിയുണ്ട്, അവർ സിപിഎം നേതാക്കളാണ് , പെരിയ കേസ് പ്രതികളെ സന്ദർശിച്ച് സി എൻ മോഹനൻ
പെരിയ ഇരട്ടകൊലക്കേസിൽ ശിക്ഷിക്കപ്പെട്ട പ്രതികളെ സി.ബി.ഐ പ്രത്യേക കോടതിയിലെത്തി സന്ദർശിച്ച് സി.പി.എം എറണാകുളം ജില്ലാ സെക്രട്ടറി സി.എൻ. മോഹനനും സി.പി.എം ജില്ലാ സെക്രട്ടേറിയേറ്റംഗം ദേവദാസനും. ശിക്ഷിക്കപ്പെട്ടവർ പാർട്ടി പ്രവർത്തകരാണെന്നും അവരെ സന്ദർശിക്കുന്നതിൽ അസ്വാഭാവികതയില്ലെന്നും സി.എൻ. മോഹനൻ പറഞ്ഞു. കുറ്റക്കാരെന്ന് കോടതി പറഞ്ഞതാണ് എന്നും കൂട്ടിച്ചേർത്തു. അവരെ കാണാൻ തന്നെയാണ് കോടതിയിൽ എത്തിയതെന്നും അപ്പീൽ നൽകുന്ന കാര്യം കാസർകോട്ടെ പാർട്ടി തീരുമാനിക്കുമെന്നും സി.എൻ. മോഹനൻ പറഞ്ഞു. മുൻ എം.എൽ.എ മുതൽ മുൻ ലോക്കൽ കമ്മിറ്റി അംഗം വരെയാണ് പെരിയയിലെ യൂത്ത് കോൺഗ്രസ് പ്രവർത്തകരെ കൊലപ്പെടുത്തിയ കേസിൽ ശിക്ഷിക്കപ്പെട്ടിരിക്കുന്നത്. പത്തുപേർക്ക് ഇരട്ട ജീവപര്യന്തവും നാല് പ്രതികൾക്ക് അഞ്ച് വർഷം കഠിനതടവിനുമാണ് കോടതി ശിക്ഷ വിധിച്ചത്.
