ഇന്ത്യയും ന്യൂസിലൻഡും തമ്മിലുള്ള അഞ്ച് മത്സര ഏകദിന പരമ്പരയിലെ മൂന്നാം മത്സരത്തിന് മഴ വില്ലനാകുന്നു. ഹാമിൽട്ടണിലെ സെഡൺ പാർക്കിൽ കനത്ത മഴ തുടരുന്നതിനാൽ മത്സരത്തിൻ്റെ ടോസ് വൈകി. മഴ മാറി കളി ആരംഭിക്കുമെന്ന പ്രതീക്ഷയിലാണ് ഇരു ടീമുകളും.
കാലാവസ്ഥാ പ്രവചനമനുസരിച്ച് ഹാമിൽട്ടണിൽ ഇന്ന് പുലർച്ചെ മൂന്ന് മണി മുതൽ ബുധനാഴ്ച പുലർച്ചെ ഒരു മണിവരെ മഴയ്ക്ക് സാധ്യതയുണ്ട്. ഇന്നത്തെ ദിവസം മഴസാധ്യത 100 ശതമാനമാണെന്നാണ് പ്രവചനം. പകൽ സമയത്ത് 99 ശതമാനവും രാത്രിയിൽ 90 ശതമാനവുമാണ് മഴസാധ്യത.
അഞ്ച് മത്സരങ്ങളടങ്ങിയ പരമ്പരയിൽ ശുഭ്മാൻ ഗില്ലിൻ്റെ നേതൃത്വത്തിലുള്ള ഇന്ത്യൻ ടീം 2–0ന് മുന്നിലാണ്. മൂന്നാം ഏകദിനത്തിലും വിജയിച്ച് പരമ്പര നേരത്തേ സ്വന്തമാക്കുകയാണ് ഇന്ത്യയുടെ ലക്ഷ്യം.
ആദ്യ രണ്ട് മത്സരങ്ങളിലും വിജയിച്ച ആത്മവിശ്വാസത്തിലാണ് ഇന്ത്യൻ ടീം. മറുവശത്ത്, സ്വന്തം മണ്ണിൽ പരമ്പരയിലേക്ക് തിരിച്ചുവരാൻ ന്യൂസിലൻഡിനും മൂന്നാം മത്സരം നിർണായകമാണ്.
ഹാമിൽട്ടണിലെ സെഡൺ പാർക്കിൽ ഇന്ത്യയുടെ ഏകദിന റെക്കോർഡ് അത്ര മികച്ചതല്ല. ഇതുവരെ ഇവിടെ കളിച്ച 12 ഏകദിനങ്ങളിൽ മൂന്ന് എണ്ണത്തിൽ മാത്രമാണ് ഇന്ത്യയ്ക്ക് വിജയിക്കാനായത്. ഒരു മത്സരം ഫലമില്ലാതെ അവസാനിച്ചു.
മഴ മാറി മത്സരം നടക്കുകയാണെങ്കിൽ വിജയം നേടുന്നതിനൊപ്പം ഈ മൈതാനത്തെ മോശം റെക്കോർഡ് തിരുത്താനും ഇന്ത്യൻ ടീമിന് അവസരമുണ്ട്.
