ഇന്ത്യൻ വിദേശകാര്യമന്ത്രി എസ്. ജയശങ്കറും അമേരിക്കൻ വിദേശകാര്യ സെക്രട്ടറി മാർക്കോ റൂബിയോയും തമ്മിലുള്ള കൂടിക്കാഴ്ച അറ്റ്ലാന്റയിൽ നടക്കും. ക്വാഡ് വിദേശകാര്യമന്ത്രിമാരുടെ യോഗത്തിൽ പങ്കെടുക്കുന്നതിനായി അറ്റ്ലാന്റയിലെത്തുന്ന ജയശങ്കർ, ഉഭയകക്ഷി ചർച്ചകളുടെ ഭാഗമായി റൂബിയോയുമായി കൂടിക്കാഴ്ച നടത്തും.
ഇന്ത്യയും അമേരിക്കയും തമ്മിലുള്ള വ്യാപാര കരാർ അന്തിമമാക്കുന്നതുമായി ബന്ധപ്പെട്ട വിഷയങ്ങൾ ചർച്ചയിൽ പ്രധാനമാകും. തീരുവ നിർണയം, വ്യാപാര വ്യവസ്ഥകൾ, വിപണി പ്രവേശനത്തിലെ തടസ്സങ്ങൾ എന്നിവ പരിഹരിച്ച് കരാറിലെത്താനാണ് ഇരുരാജ്യങ്ങളുടെയും ശ്രമം. ഇന്ത്യൻ പ്രധാനമന്ത്രിയുടെ വരാനിരിക്കുന്ന അമേരിക്കൻ സന്ദർശനത്തിന്റെ ഒരുക്കങ്ങളും അജണ്ടയും നേതാക്കൾ വിലയിരുത്തും.
അറ്റ്ലാന്റയിൽ നടക്കുന്ന ക്വാഡ് മന്ത്രിതല യോഗത്തിൽ ഇന്തോ-പസഫിക് മേഖലയിലെ സുരക്ഷാ സഹകരണം, വളർന്നുവരുന്ന സാങ്കേതികവിദ്യകൾ, വിതരണ ശൃംഖലയുടെ ശക്തിപ്പെടുത്തൽ തുടങ്ങിയ വിഷയങ്ങൾ ചർച്ചയാകും. റഷ്യ–യുക്രൈൻ സംഘർഷം, പശ്ചിമേഷ്യയിലെ സാഹചര്യം, ഊർജസുരക്ഷ, നിർമിതബുദ്ധി എന്നിവയും ഇന്ത്യ–അമേരിക്ക ചർച്ചകളിൽ ഇടംപിടിച്ചേക്കും.
