കിഴക്കൻ ബെംഗളൂരുവിലെ റിയൽ എസ്റ്റേറ്റ് മേഖലയിൽ വൻ നിക്ഷേപവുമായി പ്രമുഖ ഡെവലപ്പറായ സുമധുര ഗ്രൂപ്പ്. വൈറ്റ്ഫീൽഡ്–കണ്ണമംഗല ഇടനാഴിയിലെ 17 ഏക്കർ ഭൂമിയിൽ ഏകദേശം ₹3,500 കോടി ചെലവിൽ ആധുനിക റസിഡൻഷ്യൽ ടൗൺഷിപ്പ് വികസിപ്പിക്കുന്നതിനുള്ള സംയുക്ത വികസന കരാറിൽ (JDA) കമ്പനി ഒപ്പുവച്ചു.
വേഗത്തിൽ വികസിച്ചുകൊണ്ടിരിക്കുന്ന കിഴക്കൻ ബെംഗളൂരുവിലെ ഭവന ആവശ്യകത കണക്കിലെടുത്താണ് പുതിയ പദ്ധതി. ഐ.ടി. ഇടനാഴിയോട് ചേർന്നുള്ള ഈ പദ്ധതി പ്രീമിയം അപ്പാർട്ട്മെന്റുകൾ, ഹരിത മേഖലകൾ, ക്ലബ് ഹൗസ്, കായിക-വിനോദ സൗകര്യങ്ങൾ, കുട്ടികളുടെ കളിസ്ഥലം, മറ്റ് ആധുനിക ജീവിതസൗകര്യങ്ങൾ എന്നിവ ഉൾക്കൊള്ളുന്ന സമഗ്ര ടൗൺഷിപ്പായിരിക്കും.
വൈറ്റ്ഫീൽഡ്, ഐ.ടി.പി.എൽ, ഹോപ് ഫാം, മെട്രോ സ്റ്റേഷനുകൾ, പ്രധാന വിദ്യാഭ്യാസ സ്ഥാപനങ്ങൾ, ആശുപത്രികൾ എന്നിവയിലേക്കുള്ള മികച്ച കണക്റ്റിവിറ്റിയാണ് പദ്ധതിയുടെ പ്രധാന ആകർഷണം. ഇതോടെ പ്രദേശത്തെ റിയൽ എസ്റ്റേറ്റ് വികസനത്തിനും തൊഴിലവസരങ്ങൾക്കും കൂടുതൽ ഉണർവ് ലഭിക്കുമെന്നാണ് വിലയിരുത്തൽ.
ഭൂമിയുടെ വികസനം ഘട്ടംഘട്ടമായി നടപ്പാക്കുമെന്നും ബെംഗളൂരുവിലെ വളർന്നുവരുന്ന ഭവന ആവശ്യകത നിറവേറ്റുന്നതിൽ പദ്ധതി നിർണായക പങ്കുവഹിക്കുമെന്നും സുമധുര ഗ്രൂപ്പ് അറിയിച്ചു.
