കർണാടകയിൽ ജൂൺ 30 മുതൽ ജൂലൈ 29 വരെ നടക്കുന്ന പ്രത്യേക തീവ്ര വോട്ടർപട്ടിക പരിഷ്കരണ (SIR) നടപടികളുടെ ഭാഗമായി എല്ലാ വോട്ടർമാരും വോട്ടർപട്ടികയിൽ പേരുണ്ടെന്ന് ഉറപ്പാക്കണമെന്ന് ഡി. കെ. ശിവകുമാർ അഭ്യർഥിച്ചു. വോട്ടർപട്ടികയിൽ പേര് ഇല്ലെങ്കിൽ ഭാവിയിൽ വിവിധ സർക്കാർ ആനുകൂല്യങ്ങൾ ലഭിക്കുന്നതിലും പ്രയാസമുണ്ടാകാമെന്നും അദ്ദേഹം മുന്നറിയിപ്പ് നൽകി.
കർണാടകയിലേക്ക് രാജ്യം മുഴുവൻ ഉറ്റുനോക്കുകയാണെന്നും അതിനാൽ എല്ലാവരും തങ്ങളുടെ വോട്ടവകാശം സംരക്ഷിക്കണമെന്നും അദ്ദേഹം പറഞ്ഞു. എന്യൂമറേഷൻ ഉദ്യോഗസ്ഥർ വീടുകളിലെത്തി ഫോം നൽകുമ്പോൾ കൃത്യമായ വിവരങ്ങളും പുതിയ ഫോട്ടോയും ഉൾപ്പെടെ ആവശ്യമായ രേഖകൾ നൽകണമെന്നും ജനങ്ങളോട് അദ്ദേഹം ആവശ്യപ്പെട്ടു.
“നിങ്ങളുടെ വോട്ട് നിങ്ങളുടെ ജീവിക്കാനുള്ള അവകാശമാണ്” എന്ന് പറഞ്ഞ ഡി.കെ. ശിവകുമാർ, ചില സംസ്ഥാനങ്ങളിൽ വോട്ടർപട്ടികയുടെ അടിസ്ഥാനത്തിൽ സർക്കാർ ആനുകൂല്യങ്ങളുടെ അർഹത പരിശോധിക്കുന്ന നടപടികൾ നടക്കുന്നുണ്ടെന്നും ചൂണ്ടിക്കാട്ടി.
വോട്ടർപട്ടികയിൽ നിന്ന് പേര് ഒഴിവാകുകയാണെങ്കിൽ ഗൃഹ ജ്യോതി സ്കീം, ഗൃഹ ലക്ഷ്മി സ്കീം, പെൻഷൻ സഹായം തുടങ്ങിയ വിവിധ ക്ഷേമപദ്ധതികളും സർക്കാർ സേവനങ്ങളും ലഭിക്കുന്നതിൽ ഭാവിയിൽ ബുദ്ധിമുട്ടുകൾ ഉണ്ടായേക്കാമെന്നും അദ്ദേഹം പറഞ്ഞു.
ജനങ്ങൾക്ക് ആവശ്യമായ സഹായം നൽകുന്നതിനായി സംസ്ഥാനത്തുടനീളം ബൂത്ത് തലത്തിൽ ഹെൽപ് ഡെസ്കുകൾ പ്രവർത്തിക്കുമെന്നും ഡി.കെ. ശിവകുമാർ അറിയിച്ചു.
