കരൂര് ദുരന്തത്തെ തുടര്ന്ന് നടന് വിജയ്യുടെ തമിഴക വെട്രി കഴകം പാര്ട്ടിയുടെ പ്രാദേശിക നേതാവ് ജീവനൊടുക്കി. വിഴുപുറം ബ്രാഞ്ച് സെക്രട്ടറി വി അയ്യപ്പനാണ് ജീവനൊടുക്കിയത്. ഡിഎംകെ നേതാവും മന്ത്രിയുമായ സെന്തില് ബാലാജിക്കെതിരെ കുറിപ്പെഴുതി വെച്ചിട്ടാണ് അയ്യപ്പന് ആത്മഹത്യ ചെയ്തത്.
സെന്തില് ബാലാജിയുടെ സമ്മര്ദ്ദം കാരണം വിജയുടെ പരിപാടിക്ക് ആവശ്യമായ സുരക്ഷ ഒരുക്കിയില്ലെന്ന് കുറിപ്പില് അയ്യപ്പന് ആരോപിക്കുന്നു. കഴിഞ്ഞ ഏതാനു വര്ഷങ്ങളായി വിജയ് ഫാന്സ് അസോസിയേഷന് അംഗമായിരുന്നു. പിന്നീട് വിജയ് പാര്ട്ടി രൂപീകരിച്ചപ്പോള് പാര്ട്ടി ഭാരവാഹിയാകുകയായിരുന്നു.
കരൂര് ദുരന്തത്തില് ആദ്യ അറസ്റ്റ് പ്രത്യേക അന്വേഷണസംഘം ഇന്നലെ രേഖപ്പെടുത്തിയിരുന്നു. ടിവികെ കരൂര് വെസ്റ്റ് ജില്ലാ സെക്രട്ടറി മതിയഴകനെയാണ് അറസ്റ്റ് ചെയ്തത്. മനഃപൂര്വമല്ലാത്ത നരഹത്യ ഉള്പ്പടെ അഞ്ച് പ്രധാന വകുപ്പുകളാണ് ഇയാള്ക്കെതിരെ ചുമത്തിയിരിക്കുന്നത്. ഒളിവില് കഴിയുന്നതിനിടെയാണ് ഇയാള് അറസ്റ്റിലായത്.
