രമേശ് ചെന്നിത്തല മുഖ്യമന്ത്രിയാകാൻ യോഗ്യനെന്ന് എൻഎസ്എസ് ജനറൽ സെക്രട്ടറി ജി സുകുമാരൻ നായർ. എൻഎസ്എസ് ആസ്ഥാനത്തേയ്ക്ക് രമേശ് ചെന്നിത്തലയെ ക്ഷണിച്ചതുമായി ബന്ധപ്പെട്ടുള്ള മാധ്യമങ്ങളുടെ ചോദ്യങ്ങൾക്ക് മറുപടി നൽകുകയായിരുന്നു അദ്ദേഹം.
എല്ലാവരും ബഹുമാനിക്കുന്ന നായർ സമുദായത്തിലെ വ്യക്തിയായതുകൊണ്ടാണ് ചെന്നിത്തലയെ എൻഎസ്എസ് ആസ്ഥാനത്തേയ്ക്ക് ക്ഷണിച്ചതെന്നും മുന്നേ എടുത്ത രാഷ്ട്രീയ നിലപാട് തെറ്റാണെന്ന് മാനസിലായെന്നും അതിനാൽ ചെന്നിത്തല മാത്രമാണ് മുഖ്യമന്ത്രിയാകാൻ യോഗ്യനെന്ന അഭിപ്രായമില്ലെന്നും സുകുമാരൻ നായർ വ്യക്തമാക്കി.
രമേശ് ചെന്നിത്തല മന്നം ജയന്തി ആഘോഷങ്ങളുടെ ഭാഗമായുള പൊതുസമ്മേളനം ഉദ്ഘാടനം ചെയ്യാൻ എൻഎസ്എസ് ആസ്ഥാനത്ത് എത്തിയത് വലിയ ചർച്ചയായിരുന്നു. 11 വർഷങ്ങൾക്ക് ശേഷമായിരുന്നു ചെന്നിത്തലയുടെ പെരുന്ന സന്ദർശനം. ചടങ്ങിൽ മറ്റ് കോൺഗ്രസ് നേതാക്കന്മാർക്കും ബിജെപി നേതാക്കന്മാർക്കും ക്ഷണമുണ്ടായിരുന്നില്ല.
നേരത്തെ അറ്റോർണി ജനറൽ വെങ്കിട്ടക്കണി ഉദ്ഘാടകനായി നിശ്ചയിച്ചിരുന്നെങ്കിലും പിൻവാങ്ങി. ഇതിനെ തുടർന്നാണ് ചെന്നിത്തലയെ എൻഎസ്എസ് ക്ഷണിച്ചത്. മന്നം ജയന്തി ആഘോഷത്തിൽ മുഖ്യാതിഥിയായി പങ്കെടുക്കാൻ സാധിച്ചത് ഒരു സൗഭാഗ്യമായി കാണുന്നുവെന്ന് ചടങ്ങിൽ സംസാരിക്കവേ രമേശ് ചെന്നിത്തല പറഞ്ഞു.
‘പ്രൗഢമായ ചടങ്ങിൻ്റെ ഭാഗമാകാൻ കഴിഞ്ഞതിൽ അങ്ങേയറ്റം ചാരിതാർഥ്യമുണ്ട്. അതിന് അവസരം നൽകി തന്നെ ക്ഷണിച്ച എൻഎസ്എസ് നേതൃത്വത്തോടും അതിൻ്റെ അമരക്കാരനായ ജി സുകുമാരൻനായരോടും ഹൃദയം നിറഞ്ഞ സ്നേഹവും നന്ദിയുമുണ്ടെന്ന്’ ചെന്നിത്തല പറഞ്ഞു.
